Posts filed under ‘អ្នកនិពន្ធ’

មិន​មែន​រឿង​ងាយ..

ខ្ញុំ​ធ្លាប់​គិត​ចង់​បោះបង់​ការ​សរសេរ​ចោល.. វា​ជា​ការងារ​ដ៏​លំបាក ហើយ​វា​បាន​ក្លាយ​ទៅ​ជា​ការងារ​ដ៏​លំបាក​បំផុត​សម្រាប់​ខ្ញុំ​ដោយ​គ្មាន​មូលហេតុ។ ខ្ញុំទុក​ប៊ិច​ចោល​ជា​យូរ.. តែ​ខ្ញុំ​នៅ​តែ​ត្រូវ​រើស​វា​មក​វិញ​នៅ​ពេល​ដែល​លោក​គ្រូ​វ៉ែន សុន ជ្រើស​ខ្ញុំ​ឱ្យ​សរសេរ​កំណាព្យ​ចូលរួម​ការ​ប្រឡង​នៅ​ប្រទេស​កូរ៉េ ដោយ​ជ្រើស​រើស​យកអ្នក​និពន្ធ​៦​រូប​ឱ្យ​សរសេរ រួច​ជ្រើស​យក​កំណាព្យ​តែ​២​ប៉ុណ្ណោះ​ដើម្បី​ចូលរួម។ ខ្ញុំ​បាន​ជួប​អ្នក​និពន្ធ​៥​រូប​ផ្សេង​ទៀត.. ហើយ​ក៏​ចេះ​តែ​គិត​ថា ហេតុ​អី​មាន​ខ្ញុំ​មក​ដែរ? ខ្ញុំ​ជា​ស្អី? ..សួរ​ខ្លួន​ឯង​បែប​នេះ​ដោយ​សារ​អ្នក​និពន្ធ​ទាំង​៥​រូប​ផ្សេង​ទៀត​សុទ្ធ​តែ​ល្បីៗ ពូកែ​ៗ លោក​ ព ចាន់ពី.. សំ សុភារិន្ទ.. ចុង​ក្រោយ ខ្ញុំ​ក៏​សម្រេច​ចិត្ត​សរសេរ​ទាំង​ដែល​ខ្ញុំ​ខ្លួន​ឯង​អស់​ចិត្ត​លើ​ការ​ប្រកួត​ប្រជែង​មក​ជា​យូរ.. មិន​មែន​ដោយ​សារ​វា​ជា​ការ​ប្រកួត​ប្រជែង​បែប​អន្តរជាតិ តែ​ដោយ​សារ​តែ​លោក​គ្រូ​ជ្រើស​យក​ខ្ញុំ​នេះ​ហើយ.. ជា​ការ​អគុណ​ទោះ​ខ្ញុំ​ទទួល​អារម្មណ៍​ថា​ខ្ញុំ​មិន​អាច​ធ្វើ​បាន​ល្អ​ជាង​រៀម​ច្បង​អ្នក​និពន្ធ​ដទៃ​ក៏​ដោយ។ កំណាព្យ​ខ្ញុំ​ក៏​ត្រូវ​បាន​សមាគមជ្រើស​យក.. តែ​ខ្ញុំ​ក៏​ត្រូវ​អស់​សិទ្ធិ​ព្រោះ​ខ្ញុំ​ជាប់​បេសកកម្ម​នៅ​ជប៉ុន។ សមាគម​ជ្រើស​កំណាព្យ​អ្នក​និពន្ធ​ផ្សេង.. ខ្ញុំ​ក៏​អូខេ។ យ៉ាង​ហោច​ណាស់​ក៏​ខ្ញុំ​ដឹង​ថា​ខ្លួន​ឯង​ធ្វើ​បាន​ល្អ! ^^

ក្រោយ​បន្តិច​មក លោក​គ្រូ​វ៉ា សំអាត​ក៏​ទាក់ទង​មក​ខ្ញុំ.. លោក​គ្រូ​ចង់​ឱ្យ​ខ្ញុំ​ទៅ​ធ្វើ​ការ​ជាមួយ​គាត់.. ទៅ​សម្រួល​រឿង​កុមារ​។ ខ្ញុំ​គិត​ថា ការ​សរសេរ​រឿង​កុមារ​ងាយ​ជាង​ការ​សម្រួល​រឿង តែ​គាត់​ក៏​ប្រាប់​មក​ថា ត្បិត​តែ​ការ​សរសេរ​រឿង​ងាយ​ជាង រក​ប្រាក់​បាន​ច្រើន​ជាង ផ្ទុយ​ពី​ការ​សម្រួល​រឿង តែ​លោក​គ្រូ​បាន​ប្រាប់​មក​ថា «អ្នក​ដែល​សម្រួល​រឿង​អ្នក​ដទៃ​បាន​ពិត​ជា​មិន​ធម្មតា​ទេ.. ហើយ​ខ្ញុំ​ជឿ​ថា​រចនា​អាច​ធ្វើ​បាន!» អរគុណ​លោក​គ្រូដែល​ជឿជាក់!

អូខេ! រឿង​ពីរ​ក៏​ចប់​មក​ទៀត.. ថ្មី​ៗ​នេះ ខ្ញុំ​បាន​ទទួល​ទូរស័ព្ទ​ពី​លោក​គ្រូ​វ៉ា សំអាត​ដដែល ប្រាប់​ថា​មាន​ការ​ប្រកួត​ប្រជែង​រឿង​កុមារ​ដោយ​មាន​អ្នកនិពន្ធ​ក្មេង​ៗ​ពី​លាវ និង​វៀតណាម​ចូលរួម​ផង។ ខ្ញុំ​ចេះ​តែគិត​ក្នុង​ចិត្ត ម៉េច​ក៏​ខ្ញុំ​ទៀត​ហើយ? ហេហេ! ខ្ញុំ​មិន​បាន​ភ្លេច​ពី​ការងារ​ដែល​ត្រូវ​ធ្វើ​រាល់​ថ្ងៃ ការ​ប្រឡង​ចុង​ឆមាស ឬ​ការ​រៀន​ហ្គីតា​ដែល​ត្រូវ​ចំណាយ​ពេល​ច្រើន​នោះ​ទេ.. តែ​ខ្ញុំ​ក៏នៅ​តែ​ឆ្លើយ​អូខេ! គាត់​ទុក​ចិត្ត​យើង ហេតុ​អី​ត្រូវ​បដិសេធ​ដែរ? ជា​មនុស្ស​ម្នាក់​ដែល​គ្រូ​តែង​តែ​នឹក​ដល់ ហេតុ​អី​ត្រូវ​បដិសេធ​បំផ្លាញ​សេចក្ដី​ទុក​ចិត្ត​របស់​គាត់? ព្រឹក​មិញ​នេះ ខ្ញុំ​បាន​ទទួល​ទូរស័ព្ទ​ពី​គាត់.. យ៉ាង​ណា​ហើយ​រឿង? សរសេរ​រួច​ក៏​យក​មក​ទម្លាក់​នៅ​សមាគម​ចុះ ចាំ​គាត់​ទៅ​យក.. អរគុណ​លោកគ្រូ​ច្រើន​មែន​ទែន.. ខ្ញុំ​នឹង​ខំ​ប្រឹង​ឱ្យ​អស់​លទ្ធភាព!

អំឡុង​ពេល​ខ្ញុំ​រៀន​និពន្ធ​នៅ​សមាគម ខ្ញុំ​មិន​មែន​ជា​សិស្ស​ពូកែ តែ​ខ្ញុំ​ក៏​បាន​ខំ​ប្រឹង​សម្រាប់​អ្វី​ដែល​ខ្ញុំ​ស្រឡាញ់.. ការ​សាង​សេចក្ដី​ទុក​ចិត្ត និង​ការ​ជឿជាក់​របស់​ខ្ញុំ គឺ​ការ​ខិត​ខំ​ប្រឹង​ប្រែង​របស់​ខ្ញុំ​នេះ​ឯង ហើយ​ខ្ញុំ​ចង់​ប្រាប់​ថា​វា​មិនមែន​រឿង​ងាយ។ មក​ទល់​ពេល​នេះ ការ​រក្សា​សេចក្ដី​ទុក​ចិត្ត និង​ការជឿជាក់​ដែល​លោកគ្រូមាន​ឱ្យ​ខ្ញុំ​ក៏​កាន់​តែ​ពិបាក​ទៅ​ទៀត.. ពេល​ខ្លះ​ខ្ញុំ​អាច​នឹង​ធ្វើ​បាន​ល្អ.. តែ​ពេល​ខ្លះ​វា​ក៏​មិន​បាន​ដូច​ចិត្ត.. ខ្ញុំ​មាន​តែ​អរគុណ!

ខែ​កុម្ភៈ 16, 2011 at 10:14 ព្រឹក មតិ 3

បុរស​កើត​ច្រឡំ​ជាតិ

[…] ជីវិត​អញ​មាន​ន័យ​ដោយ​សារ​ពាក្យ «គ្មាន​ន័យ»! ពាក្យ​គ្មាន​ន័យ​នេះ​ហើយ​ដែល​អញ​អាច​រក​អនុស្សាវរីយ៍​ចុង​ក្រោយ​ឱ្យ​ពិភពលោក​មុន​នឹង​ពិភព​នេះ​លែង​ទទួល​ស្គាល់! មនុស្ស​ទាំង​អស់​គួរ​តែ​គិត​ថា​ជីវិត​របស់​ខ្លួន​ពិត​ជា​គ្មាន​ន័យ​អ្វី​ឡើយ! បើ​រវល់គិត​ថា​ជីវិត​មាន​ន័យ អ្នក​ទាំង​នោះ​នឹង​ក្លាយ​ទៅ​ជា​ទាសករ​នៃ​ពេល​វេលា​ហើយ​ចាញ់​បោក​ព្រហ្មលិខិត​ពេញ​ទំហឹង! ដោយ​សារ​តែ​មិន​ស្គាល់​អត្ថន័យ​ជីវិត​ហ្នឹង ទើប​មនុស្ស​ស្ទើរ​តែ​ទាំង​អស់​ឆ្កួត​នឹង​កំអែល​ជីវិត​និងក្លិន​ជីវិត​ដោយ​គិត​ថា​ក្លិន​នេះ​ក្រអូប ឈ្ងុយ​ឆ្ងាញ់​ស្រង់​ទៅ​មិន​ចេះ​ធុញ​មិន​ចេះ​ទ្រាន់ ហិត​ទាំង​ងងឹត​ងងុល​ពី​ព្រោះ​តែ​វង្វេង​ក្នុង​វង់​វដ្ដ​សង្សារ! […]

ខែធ្នូ 18, 2009 at 9:10 ព្រឹក មតិ 28

Deny on WordPress!

You all may have read about a young writer-NOUN Pichsoudeny here, or here. Before, you may call her and tell you’ve read her books and deeply admire her writing. But for now, visit  her here and tell her about what you wanna tell! 😀

ខែ​មីនា 29, 2009 at 4:38 ព្រឹក បញ្ចេញមតិ

ជួប​ជាមួយ​អ្នកនិពន្ធ​ថ្មី កញ្ញា «នួន ពេជ្រស៊ូដេននី»

សួស្ដី​ទាំង​អស់​គ្នា! បន្ទាប់ពីបានត្រឡប់វិលចូលពិភព Blog ឡើង​វិញ ខ្ញុំក៏​បាន​ពាំនាំយក​ព័ត៌មានខ្លះ​ៗ​ស្ដី​អំពីអ្នកនិពន្ធ​ថ្មី​មួយរូប​មក​ជម្រាប​ជូនគ្រប់​គ្នា​ឱ្យ​បានដឹង។

រូបភាព​ខាង​លើ​ជា​ប្រលោមលោក​រឿង «ផ្កាយ​រះ​ពេលថ្ងៃ» ដែលនិពន្ធ​ដោយ កញ្ញា «នួន ពេជ្រស៊ូដេននី»។ ដោយសារ​តែ​រឿងនេះត្រូវបានសរសេរ​ឡើង​ដោយ​មានលក្ខណៈ​សាមញ្ញ ងាយ​អាន ងាយ​យល់ និង មាន​ភាព​ប្រទាក់​ក្រឡា​គ្នា​ល្អឥតខ្ចោះនោះ ជា​ហេតុ​ធ្វើ​ឱ្យ​អ្នកនិពន្ធ​រូប​នេះទទួលបានការ​កោត​សរសើរ​ពីសំនាក់អ្នកអានទូទៅ ទោះបីជានេះ​ជាស្នាដៃ​ដំបូង​របស់​បងស្រីក៏ដោយ។

ជាចៃដន្យ, ខ្ញុំបាន​ប្រទះឃើញ​ឈ្មោះបង​ស្រី «ដេននី» ក្នុងបញ្ជី​រាយ​នាមបេក្ខជនដែល​ចូលរួមប្រឡងសិស្សពូកែ​ទូទាំង​ប្រទេស នា​ខេត្តសៀមរាប… ក៏​មានអារម្មណ៍​ថា សោកស្ដាយយ៉ាង​ខ្លាំងដោយ​ពុំបានជួប​បង​ស្រីដោយ​ផ្ទាល់!

ប្រហែលជាមួយ​អាទិត្យ​មុននេះ ប្រលោមលោក​ទី ២, ទី ៣ និង ទី ៤ របស់បងស្រី​បានចេញលក់​នៅ​លើ​ទី​ផ្សារ ដែលរឿង​ទាំង​នោះរួម​មាន «រឿង ដី​កោះ​កំណើត​ស្នេហ៍», «រឿង គូប្រជែងបេះដូង» និង «រឿង ស្រមោលស្នេហ៍​ក្បែរ​ភ្លើង​គំនុំ»។ ដោយ​សារតែ​បែបនេះ ខ្ញុំក៏​មានឱកាស​ទាក់ទង​បង​ស្រី «ដេននី» ជា​ថ្មី។ គាត់​បានប្រាប់​ខ្ញុំថា ពេលនេះ គាត់​កំពុង​តែនៅ​ភ្នំពេញ​ដើម្បីរៀនបំប៉ន ត្រៀម​ប្រឡង​បាក់​នា​ពេលខាង​មុខ! ខ្ញុំ​ក៏​បាន​ជួប​គាត់…

បង​ដេននី និង ខ្ញុំ 😀

ក្រៅពី​នេះ ខ្ញុំក៏បានប្រាប់គាត់ពី «យុវអ្នកនិពន្ធ​ខ្មែរ» ផងដែរ! គាត់បានសួរ​ខ្ញុំថា បើចង់ចូលជាសមាជិក «យុវអ្នកនិពន្ធ​ខ្មែរ» តើគាត់ត្រូវ​ធ្វើ​បែបណា? ខ្ញុំក៏ប្រាប់គាត់ទៅវិញថា គ្មានឃើញ​ត្រូវធ្វើ​បែប​ណាផង 😀 គ្រាន់តែមានស្នាដៃ ឬ អាចជាចំណូលចិត្ត​ខាង​និពន្ធក៏​អាច​ចូលបានទៅហើយ… (រឿង​អាច​ចូល ឬ មិនអាច គឺ​ស្ថិតលើមេ! ខ្ញុំត្រូវ​​សួរ​មេសិន 😉 !)

»សម្រាប់​សមាជិក «យ.អ.ខ»៖ បង​ដេននីចង់​​ក្លាយ​ជា​សមាជិក «យ.អ.ខ», គិតបែប​ណា​ដែរ? ខ្ញុំគិតថា ល្អណាស់! … ខ្ញុំបានសន្យា​ថា នឹង​ផ្ដល់​ចម្លើយ​ឱ្យ​គាត់​ក្រោយ​ពេល​ប្រឡង​បាក់​រួច…

ខែកក្កដា 9, 2008 at 6:35 ល្ងាច មតិ 26


ការបន្ទាន់សម័យ Twitter

Instagram

ខែសីហា 2017
អា ព្រ សុ
« កក្កដា    
 12345
6789101112
13141516171819
20212223242526
2728293031  

បណ្ណសារ


%d bloggers like this: