Posts filed under ‘ពី​កម្ពុជា’

«លោក ប៉ែន សុវណ្ណ» ជាតួអង្គសំខាន់នៅក្នុងប្រវត្តិសាស្ត្រខ្មែរសម័យទំនើប?

លោក ប៉ែន សុវណ្ណ អតីតនាយករដ្ឋមន្ដ្រីទី១ នៃសម័យសាធារដ្ឋប្រជាមានិតកម្ពុជា បានទទួលមរណភាពហើយ កាលពីវេលាម៉ោង៧និង១៧នាទី យប់ថ្ងៃសៅរ៍ទី២៩តុលា ក្នុងជន្មាយុ៨០ឆ្នាំ។ នៅក្នុងប្រវត្តិសាស្ត្រកម្ពុជា លោក ប៉ែន សុវណ្ណ បានចូលរួមក្នុងចលនារំដោះជាតិជាច្រើនសម័យ មុននឹងត្រូវបានលើកបន្តុបជានាយករដ្ឋមន្ដ្រីនៅឆ្នាំ១៩៨១។

នៅក្នុងសម័យសាធារណរដ្ឋប្រជាមានិតកម្ពុជា លោក ប៉ែន សុវណ្ណ កាន់តំណែងជានាយករដ្ឋមន្ដ្រីបានតែប្រមាណ៦ខែប៉ុណ្ណោះ ពោលគឺចាប់ពីថ្ងៃទី២៧មិថុនា ដល់ថ្ងៃទី២ធ្នូ១៩៨១។ លោកត្រូវបានចាប់ខ្លួនដោយជំនាញការវៀតណាម នៅថ្ងៃទី២ធ្នូឆ្នាំ១៩៨១ និងបញ្ជូនទៅឃុំខ្លួននៅប្រទេសវៀតណាមអស់រយៈពេល១០ឆ្នាំនិង៥២ថ្ងៃ។

ក្នុងសៀវភៅ សុបិននិងការពិត លោក វ៉ាន់ឌី កាអុន បានសរសេរថា ការដកហូតដំណែង លោក ប៉ែន សុវណ្ណ គឺបណ្ដាលមកពីលោកប្រមាថទីក្រុងហាណូយយ៉ាងខ្លាំង ដោយចង់មានទំនាក់ទំនងដោយផ្ទាល់ជាមួយទីក្រុងមូស្គូ រំលងទីក្រុងហាណូយ។ និងបណ្ដាលមកពី លោក ប៉ែន សុវណ្ណ ប៉ុនប៉ងរំដោះកម្ពុជាពីការគាបសង្កត់របស់វៀតណាម ហើយប្រឆាំងនឹងនយោបាយអន្តោប្រវេសន៍វៀតណាមនៅកម្ពុជា។ ប៉ុន្តែសំខាន់ជាងនេះ លោកប៉ែន សុវណ្ណ របូតពីតំណែង ហើយត្រូវគេចាប់ដាក់គុក ក៏ព្រោះតែលោកដែលជាអតីតខ្មែរវៀតមិញ ដណ្ដើមតួនាទីដឹកនាំរបស់ក្រុមខ្មែរក្រហមភូមិភាគបូព៌ាប្រឆាំងនឹងប៉ុលពត ដែលគេស្គាល់ថា ជាក្រុមលោក ជា ស៊ីម, ហេង សំរិន, និង ហ៊ុន សែន។ គឺទំនាស់ប្រជែងអំណាចរវាងចរន្តទាំងពីរនេះហើយដែលធ្វើឲ្យវៀតណាមបារម្ភ ហើយបង្ខំចិត្តកម្ចាត់ចោលមួយ។

p-sovann1

កើតនៅថ្ងៃទី១៥មេសា១៩៣៦ នៅក្នុងឃុំសំរោង ស្រុកត្រាំកក់ ខេត្តតាកែវ លោក ប៉ែន សុវណ្ណ បានឆ្លងកាត់របបនយោបាយខ្មែរជាច្រើនជំនាន់ ហើយបានចូលរួមចំណែកជាបន្តបន្ទាប់នៅក្នុងព្រឹត្តិការណ៍ជាប្រវត្តិសាស្ត្រទាំងនោះ។

តាំងពីវ័យត្រឹមតែ១៥ឆ្នាំ កុមារា ប៉ែន សុវណ្ណ បានចូលប្រឡូកនៅក្នុងចលនាខ្មែរឥស្សរៈ ដើម្បីតស៊ូរំដោះជាតិចេញពីអាណានិគមបារាំង។ ក្រោយចលនាតស៊ូប្រឆាំងអាណានិគមបារាំងបញ្ចប់នៅឆ្នាំ១៩៥៤ ប៉ែន សុវណ្ណ ត្រូវគេបញ្ជូនទៅបន្តការសិក្សានៅប្រទេសវៀតណាម ផ្ដើមចេញពីវគ្គបណ្ដុះបណ្ដាលនាយទាហាន រហូតបានចូលសិក្សានៅវិទ្យាស្ថានជាន់ខ្ពស់ផ្នែកនយោបាយនិងសេដ្ឋកិច្ច។ នៅក្នុងអំឡុងពេលរស់នៅនិងរៀនសូត្រនៅប្រទេសវៀតណាមនោះហើយ លោក ប៉ែន សុវណ្ណ មានភរិយា និងមានបុត្រចំនួន៣នាក់ ស្រី២ ប្រុសមួយ។ មតិមួយចំនួនបញ្ជាក់ថា ភរិយារបស់លោក ប៉ែន សុវណ្ណ ជាក្មួយស្រីរបស់ថ្នាក់ដឹកនាំជាន់ខ្ពស់វៀតណាម។ ប៉ុន្តែនៅក្នុងសៀវភៅនាយករដ្ឋមន្ដ្រីខ្មែរទាំង៣៦រូបរបស់លោក ឆាយ សុផល លោក ប៉ែន សុវណ្ណ បានអះអាងថា ភរិយារបស់លោកឈ្មោះកញ្ញា គឺជាជនជាតិខ្មែរកម្ពុជាក្រោម។

លោក ប៉ែន សុវណ្ណ បានត្រឡប់មកកម្ពុជាវិញ ក្រោយរដ្ឋប្រហារថ្ងៃទី១៨មីនា១៩៧០ ដើម្បីចូលរួមជាមួយអង្គការចាត់តាំងខ្មែរក្រហម ទទួលបន្ទុកការងារព័ត៌មានក្រោមបង្គាប់លោក អៀង សារី។ ប៉ុន្តែដោយសារតែដឹងពីគម្រោងអាក្រក់របស់ថ្នាក់ដឹកនាំមកលើខ្លួន លោក ប៉ែន សុវណ្ណ បានរត់ត្រឡប់ប្រទេសទៅវៀតណាមវិញនៅឆ្នាំ១៩៧៤។

លោក ប៉ែន សុវណ្ណ (រូបទី២ រាប់ពីឆ្វេង)

លោក ប៉ែន សុវណ្ណ (រូបទី២ រាប់ពីឆ្វេង)

ឆ្នាំ១៩៧៨ ជាព្រឹត្តិការណ៍សំខាន់មួយទៀតនៅក្នុងរបត់ជីវិតលោក ប៉ែន សុវណ្ណ និងនៅក្នុងរបត់ប្រវត្តិសាស្ត្រកម្ពុជា។ ជាពេលដែលលោកបានជួបជាមួយក្រុមខ្មែរក្រហមនៅភូមិភាគបូព៌ាដែលបះបោរប្រឆាំងនឹង ប៉ុល ពត ដឹកនាំដោយ ហេង សំរិន, ជា ស៊ីម, ហ៊ុន សែន។ លោកប៉ែន សុវណ្ណ និងក្រុមខ្មែរក្រហមភូមិភាគបូព៌ា បានបង្កើតរណសិរ្យមួយ ឈ្មោះថា រណសិរ្យសាមគ្គីសង្គ្រោះជាតិកម្ពុជា។ ទីបំផុត រណសិរ្សសាមគ្គីសង្គ្រោះជាតិកម្ពុជា ក្រោមការជួយជ្រោមជ្រែងពីវៀតណាម បានវាយរំលំរបបកម្ពុជាប្រជាធិបតេយ្យនៅថ្ងៃទី៧មករា១៩៧៩។ លោក ប៉ែន សុវណ្ណ ត្រូវបានតែងតាំងជានាយរដ្ឋមន្ដ្រីទី១ នៃរបបសាធារណរដ្ឋប្រជាមានិតកម្ពុជា នៅថ្ងៃទី២៧មិថុនា១៩៨១ ប៉ុន្តែលោកត្រូវគេដកហូតដំណែងនៅចុងឆ្នាំ១៩៨១ ហើយបញ្ជូនទៅឃុំឃាំងនៅប្រទេសវៀតណាម។

2_story_1_1

បន្ទាប់ពីជាប់គុកងងឹតនៅប្រទេសវៀតណាមអស់១០ឆ្នាំនិង៥២ថ្ងៃ លោក ប៉ែន សុវណ្ណ ត្រូវបានដោះលែងឲ្យត្រឡប់មកកម្ពុជាវិញនៅថ្ងៃទី២៥មករាឆ្នាំ១៩៩២។ ដំបូងឡើយបានត្រឡប់ចូលមកបម្រើការនៅគណបក្សប្រជាជនកម្ពុជាវិញ មុននឹងងាកទៅចូលរួមជាមួយគណបក្សជាតិខ្មែរ របស់លោក សម រង្ស៊ី។ ជាបន្តបន្ទាប់ លោក ប៉ែន សុវណ្ណ បានផ្លាស់ប្ដូរទ្រនំ បង្កើតគណបក្សទ្រទ្រង់ជាតិ ដើម្បីដឹកនាំខ្លួនឯង និងចូលរួមជាមួយគណបក្សសិទ្ធិមនុស្សរបស់លោក កឹម សុខា នៅឆ្នាំ២០០៧។ មុនពេលទទួលមរណភាព លោក ប៉ែន សុវណ្ណ ជាតំណាងរាស្ត្រគណបក្សសង្គ្រោះជាតិប្រចាំខេត្តកំពង់ស្ពឺ។ នៅក្នុងបទសម្ភាសជាមួយវិទ្យុបារាំង លោក ប៉ែន សុវណ្ណ ចាត់ទុកការជាប់ជាតំណាងរាស្ត្រនៅក្នុងអាណត្តិទី៥នេះ ថាជាពេលវេលាចុងក្រោយនៃជីវិតរបស់លោក ក្នុងការបម្រើជាតិមាតុភូមិ៕

Advertisements

ខែតុលា 30, 2016 at 10:02 ល្ងាច បញ្ចេញមតិ

អណ្ដើក​ហ្លួង សត្វ​ល្មូន​តំណាង​ឲ្យ​កម្ពុជា

អណ្ដើកហ្លួង? ហេតុអ្វីបានជាគេជ្រើសសត្វល្មូននេះតំណាងឲ្យកម្ពុជា? ចុះវាខុសប្លែកពីសត្វអណ្ដើកផ្សេងយ៉ាងម៉េចខ្លះ? ខ្ញុំក៏មិនដឹងដែរ! ហេហេ ខ្ញុំទើបតែបានស្គាល់អណ្ដើកហ្លួងនេះកាលពីដើមសប្ដាហ៍ នៅពេលអង្គការសមាគមអភិរក្សសត្វព្រៃ WCS Cambodia អញ្ជើញឲ្យទៅស្វែងយល់ពីសត្វអណ្ដើកហ្លួងនៅខេត្តកោះកុង។

dscf7933

អណ្ដើកហ្លួងគឺជាអណ្ដើកមួយប្រភេទដែលកំពុងរងគ្រោះជិតផុតពូជបំផុតនៅលើសកលលោក។ សត្វអណ្ដើកហ្លួងមានវត្តមានតែនៅក្នុងប្រទេសចំនួន៤ប៉ុណ្ណោះ គឺកម្ពុជា ឥណ្ឌា បង់ក្លាដែស និងឥណ្ឌូនេស៊ី។ ក្នុងនោះសត្វអណ្ដើកហ្លួងនៅកម្ពុជា មានចំនួនច្រើនជាងគេ។ (ហ្នឹងហើយ! សរសេរមិនខុសទេ! នៅកម្ពុជាមានសត្វអណ្ដើកហ្លួងច្រើនជាងគេ! ពិសេសទេ?)

អណ្ដើកហ្លួង ឬអណ្ដើកសរសៃ ដែលជាសត្វល្មូនតំណាងឲ្យប្រទេសកម្ពុជា ត្រូវបានបញ្ជូលទៅក្នុងបញ្ជីក្រហមរបស់អង្គការ IUCN និងអនុក្រឹត្យលេខ ១២៣ អនក្រ បក ចុះថ្ងៃទី១២សីហា ឆ្នាំ២០១៤ ថាជាប្រភេទសត្វជិតផុតពូជនៅកម្ពុជា។

ហេតុអ្វីបានជាសត្វនេះជិតផុតពូជ? ព្រោះតែវាត្រូវការរយៈពេលយូរដើម្បីបង្កកំណើត។ ទម្រាំតែអាចបន្តពូជបាន អណ្ដើកហ្លួងត្រូវមានអាយុ២៥ឆ្នាំសិន! សត្វអណ្ដើកហ្លួង រងការគម្រាមកំហែងពីការបំផ្លាញទីជម្រក តាមរយៈការបូមខ្សាច់ ការកាប់ឆ្ការព្រៃលិចទឹក និងការនេសាទខុសច្បាប់ជាដើម។

dscf7950

អង្គការ WCS សហការជាមួយរដ្ឋបាលជលផលកម្ពុជា បានសហការគ្នាអភិរក្សសត្វអណ្ដើកហ្លួងនេះ បន្ទាប់ពីរកឃើញថា ពួកវានៅសេសសល់តិចតួចក្នុងខេត្តកោះកុង នៅឆ្នាំ២០០០។ ក្នុងនោះ ស្ថាប័ននេះបានបង្កើតមជ្ឈមណ្ឌលថែរក្សា ក៏ដូចជាកម្មវិធីការពារសំបុក ដោយមានការចូលរួមពីប្រជាសហគមន៍នៅក្នុងស្រុកស្រែអំបិល។ អ្នកដែលធ្លាប់ប្រមូលពង និងកូនអណ្ដើកទៅលក់ ត្រូវបានជ្រើសរើសឲ្យធ្វើជាបុគ្គលិកគម្រោងដើម្បីស្វែងរក និងការពារសំបុកសត្វអណ្ដើកហ្លួងជំនួសវិញ។ ដោយឡែក កូនអណ្ដើកដែលកើតចេញពីសំបុកការពារនោះ ត្រូវបានយកទៅកាន់មណ្ឌលអភិរក្សដើម្បីចិញ្ចឹមនិងថែរក្សា មុនពេលព្រលែងទៅកាន់ធម្មជាតិវិញ។

dscf7965

ការព្រលែងទៅកាន់ធម្មជាតិនោះទៀតសោត មុននឹងព្រលែង គេបានដាក់ Transmitter ភ្ជាប់ជាមួយសត្វអណ្ដើក ដើម្បីតាមដានវា។ កាលពីឆ្នាំ២០១៥ អង្គការ WCS និង រដ្ឋបាលជលផល បានព្រលែងសត្វអណ្ដើកហ្លួង២១ក្បាលទៅកាន់ធម្មជាតិវិញ ហើយក្នុងនោះ សត្វអណ្ដើកចំនួន៣ក្បាលត្រូវគេរកឃើញថា បានធ្វើដំណើរទៅផ្នែកខាងក្រោមនៃព្រែកស្រែអំបិល កាត់តាមតំបន់ឆ្នេរដល់ទន្លេមួយទៀត មានចម្ងាយជាង៩៧គីឡូម៉ែត្រ ពីកន្លែងលែង។

នៅកម្ពុជា អណ្ដើកហ្លួងត្រូវបានគេរកឃើញថា មានតែនៅក្នុងខេត្តកោះកុងប៉ុណ្ណោះ ពិសេសនៅក្នុងស្រុកស្រែអំបិល តំបន់ទឹកភ្លាវ។ តំបន់ទឹកភ្លាវ មិនមែនដោយសារដាក់ប៊ីចេងជ្រុលទេ ហេហេហេ! តំបន់ទឹកភ្លាវ គឺជាកន្លែងប្រជុំរវាងទឹកសាបនិងទឹកប្រៃ។ ទឹកនៅទីនោះ មិនប្រៃ មិនសាប តែប្រៃឡមៗ។ (ធ្លាប់ភ្លក់ឬទើបដឹង? ហេហេ! មិនបានភ្លក់ទេ! ថាតាមគេប្រាប់ប៉ុណ្ណោះ!)

dscf7945

កាលពីដើម អណ្ដើកហ្លួងត្រូវបានចិញ្ចឹមនិងថែរក្សានៅមជ្ឈមណ្ឌលតូចមួយ។ ប៉ុន្តែឥឡូវនេះ រដ្ឋបាលជលផល និងអង្គការសមាគមអភិរក្សសត្វព្រៃ បានសហការគ្នារៀបចំមណ្ឌលថ្មី ធំជាងមុន ដើម្បីសម្រួលការងារអភិរក្សសត្វអណ្ដើកហ្លួង។ មណ្ឌលថ្មីនោះ គេដាក់ឈ្មោះថា មជ្ឈមណ្ឌលអភរិក្សប្រភេទសត្វល្មូនខេត្តកោះកុង មានទំហំជិត១០ហិកតាឯណោះ។

dscf8060

មជ្ឈមណ្ឌលថ្មី មានកន្លែងថែរក្សាកូនអណ្ដើកហ្លួង មានស្រះទឹកសម្រាប់សត្វអណ្ដើកហ្លួងធំៗ។ សត្វធំៗនៅមណ្ឌលនេះ មានទម្ងន់ដល់ទៅ១០គីឡូក្រាមឯណោះ។

dscf8174-2

ក្រៅពីអណ្ដើក មណ្ឌលនេះក៏មានសត្វក្រពើត្រីផងដែរ!

dscf8144-3

មជ្ឈមណ្ឌលអភិរក្សប្រភេទសត្វល្មូន ដែលនៅមិនឆ្ងាយប៉ុន្មានឡើយពីទីរួមខេត្តកោះកុង។ នាពេលដ៏ឆាប់ខាងមុខ មួយផ្នែកនៃមជ្ឈមណ្ឌលនេះ នឹងត្រូវប្រែក្លាយឲ្យទៅជាមជ្ឈមណ្ឌលទេសចរណ៍ ដើម្បីទាក់ទាញសាធារណៈជនឲ្យចូលទស្សនាស្វែងយល់ពីសត្វអណ្ដើកហ្លួង។ ថវិកាបានពីការលក់សំបុត្រចូលទស្សនាមជ្ឈមណ្ឌលនេះ នឹងត្រូវបង្វិលទាំងស្រុងចូលទៅក្នុងមូលនិធិសម្រាប់ការអភិរក្ស និងថែរក្សាសត្វអណ្ដើកហ្លួង។ កុំភ្លេចទៅលេងទាំងអស់គ្នាណ៎ា! :* :* :*

ខែកញ្ញា 15, 2016 at 11:02 ព្រឹក បញ្ចេញមតិ

ស្ដ្រី​ខ្មែរ​និង​ទិដ្ឋាការ​ទៅ​ប្រទេស​ចិន

ការ​ស្នើ​សុំ​ទិដ្ឋាការ​ទៅ​ប្រទេស​ចិន សម្រាប់​ស្ដ្រី​ខ្មែរ មាន​លក្ខណៈ​តឹង​រ៉ឹង​ណាស់​។ ខ្ញុំ​បាន​ទៅ​ធ្វើ​ទិដ្ឋាការ​នៅ​ស្ថានទូត​​ចិន​កាល​ពី​អាទិត្យ​មុន​។ គិត​ថា ដំណើរការ​នឹង​ដូច​គ្នា​ទៅ​នឹង​ការ​ស្នើ​សុំ​ទិដ្ឋាការ​ទៅ​កាន់​ប្រទេស​ដទៃ​ទៀត​ដែរ។ ប៉ុន្តែ សម្រាប់​ស្ដ្រី​ខ្មែរ​ដែល​មាន​អាយុ​ពី​១៨​ឆ្នាំ​ទៅ​ដល់​៣០​ឆ្នាំ និង​ដែល​មិន​ធ្លាប់​ទៅ​កាន់​ប្រទេស​ចិន ស្ថានទូត​តម្រូវ​ឲ្យ​នារី​នោះ ទៅ​កាន់​ស្ថានទូត​ដោយ​ខ្លួន​ឯង ដើម្បី​ស្នើ​សុំ​ទិដ្ឋាការ​។

ក្រៅ​តែ​ពី​ការ​បង្ហាញ​វត្តមាន​របស់​ខ្លួន​ហើយ នារី​ខ្មែរ​ត្រូវ​បាន​ខាង​ស្ថានទូត​សម្ភាស និង​តម្រូវ​ឲ្យ​សរសេរ​លិខិត​ធានា​ពី​ការ​វិល​ត្រឡប់​របស់​ខ្លួន មក​កាន់​កម្ពុជា​វិញ​​ថែម​ទៀត​ផង​។

វា​មិន​មែន​ជា​រឿង​ចម្លែក​ទេ ដែល​ស្ថានទូត​ចិន រឹត​បន្តឹង​ចំពោះ​ការ​សុំ​ទិដ្ឋាការ​របស់​នារី​ខ្មែរ ទៅ​កាន់​ប្រទេស​ចិន​។ ព្រោះ​ដូច​យើង​ដឹង​ស្រាប់​ហើយ​ថា ជា​រៀង​រាល់​ឆ្នាំ ស្ដ្រី​ខ្មែរ​ច្រើន​ណាស់ ដែល​បាន​ចាញ់​បោក​ការ​បញ្ឆោត​ឲ្យ​ទៅ​រៀបការ​នៅ​ប្រទេស​ចិន​។ វា​ធ្វើ​ឲ្យ​អន្ដរជាតិ​មើល​ឃើញ​ប្រទេស​ចិន​ក្នុង​រូបភាព​មិន​ល្អ ហើយ​ខ្មែរ​ខ្លួន​ឯង បាន​ក្លាយ​ទៅ​ជា​ប្រទេស​ដែល​មិន​មាន​សមត្ថភាព​គ្រប់គ្រាន់​ក្នុង​ការ​ទប់ស្កាត់​អំពើ​ខុស​ច្បាប់​ដោយ​អតនោម័ត។

បើ​ទោះ​បី​ជា​ដំណើរការ​​តឹងរ៉ឹង​បន្តិចក៏​ដោយ ប៉ុន្តែ​ចុង​ក្រោយ ខ្ញុំ​បាន​ទទួល​ហើយ ទិដ្ឋាការ​ទៅ​កាន់​ប្រទេស​ចិន​។

VisatoChina

ខ្ញុំ​នឹង​ទៅ​ទីក្រុង​ក្វាងចូវ ប្រទេស​ចិន នៅ​ថ្ងៃ​ទី​១៤ ខែ​មីនា​នេះ តាម​ជើង​ហោះហើរ​ China Southern Airlines។ នេះ​ជា​ដំណើរ​ទៅ​កាន់​ប្រទេស​ចិន លើក​ទី​១​របស់​ខ្ញុំ​៕

ខែ​មីនា 3, 2016 at 10:25 ព្រឹក បញ្ចេញមតិ

តើ​ការ​ផ្ញើ​កំណត់​ទូត​គ្រប់​គ្រាន់​ហើយ​ឬ ដើម្បី​ដោះ​ស្រាយ​បញ្ហា​ព្រំដែន​កម្ពុជា វៀតណាម​?

ដោយ៖ អ៊ឹម រចនា

ក្រសួង​ការបរទេស​កម្ពុជា នៅ​ថ្ងៃ​អាទិត្យ​ម្សិលមិញ បាន​ផ្ញើ​កំណត់​ទូត​មួយ​ថ្មី​ទៀត ទៅ​កាន់​ប្រទេស​វៀតណាម​។ ​កំណត់​ទូត​នេះ ធ្វើ​ឡើង​បន្ទាប់​ពី​កម្ពុជា​រក​ឃើញ​ថា វៀតណាម​បាន​ជីក​ស្រះទឹក​ចំនួន​៣​បន្ថែម​ទៀត កំបាំង​ក្នុង​ព្រៃ នៅ​ក្នុង​តំបន់​ហាម​ឃាត់​ ស្ថិត​ក្នុង​ស្រុក​អូយ៉ាដាវ ខេត្ត​រតនគិរី​។ ការ​ផ្ញើ​កំណត់​ទូត​ពី​សំណាក់​កម្ពុជា​ទៅ​ប្រទេស​វៀតណាម​នៅ​ពេល​នេះ បាន​ទទួល​ការ​គាំទ្រ​ពី​គណបក្ស​ប្រឆាំង​។ ប៉ុន្តែ​សួរ​ថា​តើ​​វា​គ្រប់​គ្រាន់​ហើយ​ឬ ដើម្បី​បញ្ឈប់​ភាព​គគ្លើន​របស់​វៀតណាម មិន​ឲ្យ​​រំលោភ​បូរណភាព​ទឹក​ដី​កម្ពុជា​?

បញ្ហា​ព្រំដែន​កម្ពុជា​វៀតណាម បាន​ចាប់​ផ្ដើម​រង្គ្រោះ​រង្គើ​ឡើង​វិញ ក្រោយ​ពេល​ក្រុម​អ្នក​តំណាង​រាស្ត្រ​គណបក្ស​សង្គ្រោះ​ជាតិ បាន​ចុះ​ទៅ​កាន់​មូលដ្ឋាន និង​បានអះអាង​​ថា វៀតណាម​បាន​រំលោភ​បូរណភាព​ទឹក​ដី​កម្ពុជា​ជា​ច្រើន​កន្លែង​។ ក្នុង​នោះ​មាន​ជា​អាថិ៍​៖ នៅ​ស្រុក​អូយ៉ាដាវ​ខេត្ត​រតនគិរី នៅ​ស្រុក​រំដួល​និង​ស្រុក​ចន្ទ្រា​ខេត្ត​ស្វាយ​រៀង នៅ​ច្រក​ដាក់​ដាំ​ខេត្ត​មណ្ឌល​គិរី ស្រុក​កំពង់ត្រាច​ខេត្ត​កំពត និង​ស្រុក​មេមត់​​ខេត្ត​ត្បូង​ឃ្មុំ​ជា​ដើម​។

តំណាង​រាស្ត្រ​បក្ស​ប្រឆាំង ដឹក​នាំ​ប្រជាពលរដ្ឋ ចុះ​ពិនិត្យ​ព្រំដែន​នៅ​ស្រុក​រំដួល ខេត្ត​ស្វាយ​រៀង ថ្ងៃ​ទី​១៤ ខែ​មិថុនា ឆ្នាំ​២០១៥

តំណាង​រាស្ត្រ​បក្ស​ប្រឆាំង ដឹក​នាំ​ប្រជាពលរដ្ឋ ចុះ​ពិនិត្យ​ព្រំដែន​នៅ​ស្រុក​រំដួល ខេត្ត​ស្វាយ​រៀង ថ្ងៃ​ទី​១៤ ខែ​មិថុនា ឆ្នាំ​២០១៥

តប​ទៅ​នឹង​ការ​រកឃើញ​របស់​តំណាង​រាស្ត្រ​គណបក្ស​ប្រឆាំង​នេះ រដ្ឋាភិបាល​កម្ពុជាបាន​​​បដិសេធ និង​បាន​អះអាង​ថា ដី​ទាំង​អស់​នោះ ស្ថិត​នៅ​ក្នុង​បូរណភាព​ដែនដី​វៀតណាម លើក​លែង​តែ​នៅ​ច្រក​ដាក់ដាំ ខេត្ត​មណ្ឌល​គិរី និង​នៅ​ត្រង់​ចំណុច​ភូមិ​ឡំ ឃុំ​ប៉ក់ញ៉ៃ ស្រុក​អូយ៉ាដាវ ខេត្ត​រតនគិរី​ប៉ុណ្ណោះ ដែល​វៀតណាម​រំលោភ​ចូល​ទឹកដី​កម្ពុជា​។

ចំពោះ​ករណី​នៅ​ច្រក​ដាក់ដាំ ខេត្ត​រតនគិរី​។ រដ្ឋាភិបាល​កម្ពុជា​ទទួល​ស្គាល់​ថា វៀតណាម​ពិត​ជា​បាន​កសាង​ផ្លូវ​ចូល​ក្នុង​ទឹក​ដី​កម្ពុជា​ពិត​មែន​ និង​បាន​ស្នើ​ឲ្យ​វៀតណាម​បញ្ឈប់​ការ​សាង​សង់​នោះ ប៉ុន្តែ​វៀតណាម​មិន​ស្ដាប់​។ នៅ​ត្រង់​ចំណុច​ច្រក​ដាក់ដាំ​នេះ កម្ពុជា​និង​វៀតណាម មាន​គំនិត​ខ្វែង​គ្នា ព្រោះ​ថា ប្រទេស​ទាំង​ពីរ​ប្រកាន់​ឯកសារ​សំអាង​ពីរ​ផ្សេង​គ្នា​។ កម្ពុជា​សំអាង​លើ​សេចក្ដី សម្រេច​របស់​អគ្គ​ទេសាភិបាល​បារាំង ឆ្នាំ​១៩១៤ ថា ចំណុច​ដាក់ដាំ​ស្ថិត​នៅ​ក្នុង​ទឹក​ដី​កម្ពុជា​។ ប៉ុន្តែ​ប្រទេស​វៀតណាមសំអាង​លើ​គំនូស​ផែនទី​របស់​ក្រុម​ភូមិសាស្ត្រ​ឥណ្ឌូចិន​ទៅ​វិញ​។

ដោយ​ឡែក សម្រាប់​ចំណុច​ភូមិ​ឡំ ឃុំ​ប៉ក់ញ៉ៃ ស្រុក​អូយ៉ាដាវ ខេត្ត​រតនគិរី​វិញ​។ ​ក្រសួង​ការបរទេស​កម្ពុជា​ផ្ញើ​កំណត់​ទូត​ផ្លូវ​ការ​ទៅ​កាន់​ស្ថាន​ទូត​វៀតណាម​ប្រចាំ​នៅ​កម្ពុជា​ថា ​វៀតណាម​ជីក​ស្រះ​ទឹក​៥​កន្លែង​ចូល​ក្នុង​ទឹក​ដី​ខ្មែរ​។ កំណត់​ទូត​ចុះ​ថ្ងៃទី ១២ មិថុនា បាន​គូស​បញ្ជាក់​​ថា ស្រះ​ទឹក​ទាំង​៥​កន្លែង ត្រូវ​បាន​ភាគី​វៀតណាម​ជីក​ចូល​ក្នុង​ដី​ខ្មែរ​ពី​ចន្លោះ​ជាង ៣០០ ម៉ែត្រ ទៅជាង ៥០០ម៉ែត្រ នៅ​ក្នុង​ស្រុក​អូយ៉ាដាវ ខេត្ត​រតនគិរី​។ ពីរ​ថ្ងៃ​បន្ទាប់​ពី​ផ្ញើ​កំណត់​ទូត​ទី​១ គឺ​នៅ​ថ្ងៃ​ទី​១៤​ខែ​មិថុនា កម្ពុជា​បាន​ផ្ញើ​​កំណត់​ទូត​ទី​២​ទៅ​វៀតណាម​​។ កំណត់​ទូត​ទី​២​នេះ ធ្វើ​ឡើង​បន្ទាប់​ពី​កម្ពុជា​រក​ឃើញ​ថា វៀតណាម​បាន​ជីក​ស្រះទឹក​ចំនួន​៣​បន្ថែម​ទៀត កំបាំង​ក្នុង​ព្រៃ នៅ​ក្នុង​តំបន់​ហាម​ឃាត់​ ស្ថិត​ក្នុង​ស្រុក​អូយ៉ាដាវ ខេត្ត​រតនគិរី​។

តាម​រយៈ​កំណត់​ទូត រដ្ឋា​ភិបាល​កម្ពុជា​ បាន​ទាមទារ​ឲ្យ​រដ្ឋាភិបាល​វៀតណាម​គោរព​ខ្សែ​បន្ទាត់​ព្រំដែន​នៃ​ផែនទី បោន ខ្នាត​១​លើ​១​រយ​ពាន់ ដែល​ជា​មូលដ្ឋាន​នៃ​សន្ធិសញ្ញា​ឆ្នាំ​១៩៨៥ និង​​សន្ធិសញ្ញា​បំពេញ​បន្ថែម​ឆ្នាំ​២០០៥  ដែល​កម្ពុជា​និង​​វៀត​តាម​បាន​ទទួល​ស្គាល់​រួមគ្នា​​កន្លង​មក​។ នៅ​ក្នុង​សំណុំ​រឿង​នេះ​ដែរ លោក​នាយក​រដ្ឋមន្ដ្រី​ហ៊ុន សែន ក៏​បានស្នើ​​នៅ​ចំពោះ​មុខ​លោក ឡេ ហុងអាញ់ ដែល​ជា​សមាជិក​ការិយាល័យ​នយោបាយ​បក្ស​កុម្មុយនីស្ត​វៀតណាម ថា ឲ្យ​វៀតណាម​រក្សា​ភាព​ស្ងប់ស្ងាត់​នៅ​តាម​តំបន់​ព្រំដែន ជា​ពិសេស​ព្រំដែន​ខេត្ត​រតនគិរី​។

1-1

លោក​នាយក​រដ្ឋ​មន្ដ្រី ហ៊ុន សែន ជួប​ជាមួយ​លោក ឡេ ហុងអាញ់ សមាជិក​ការិយាល័យ​នយោបាយ បក្ស​កុំម្មុយនីស្ត​វៀតណាម

ការ​ផ្ញើ​កំណត់​ទូត​ក៏​ដូច​ជា​សំណើ​ផ្ទាល់​មាត់ ​ពី​សំណាក់​កម្ពុជា​ទៅ​ប្រទេស​វៀតណាម​នៅ​ពេល​នេះ បាន​ទទួល​ការ​គាំទ្រ​ពី​គណបក្ស​ប្រឆាំង​។ នៅ​ក្នុង​ជំនួប​ជាមួយ​សកម្មជន​នៅ​ខេត្ត​ព្រះសីហនុ លោក សម រង្ស៊ី បាន​ប្រកាស​គាំទ្រ​ចំពោះ​ចំណាត់ការ​ការទូត​របស់​រដ្ឋាភិបាល​កម្ពុជា ទាក់ទងទៅ​នឹង​បញ្ហា​ព្រំដែន​កម្ពុជា​វៀតណាម ត្រង់​ចំណុច​​ភូមិ​ឡំ ស្រុក​ប៉ក់ញ៉ៃ ស្រុក​អូយ៉ាដាវ ខេត្ត​រតនគិរី​​នេះ​។

ជា​ការ​ពិត ការ​ដោះ​ស្រាយ​បញ្ហា​រវាង​ប្រទេស​ដោយ​ចំណាត់ការ​ការទូត គឺ​ជា​ដំណោះ​ស្រាយ​ដ៏​ត្រឹមត្រូវ​មួយ​។ ប៉ុន្តែសួរ​ថា​តើ​វា​មាន​ប្រសិទ្ធិភាព​គ្រប់​គ្រាន់​ហើយ​ឬ​នៅ ដើម្បី​បញ្ឈប់​ភាព​គគ្លើន​របស់​វៀតណាម មិន​ឲ្យ​​រំលោភ​បូរណភាព​ទឹក​ដី​កម្ពុជា​?

នៅ​ក្នុង​បណ្ដា​ប្រទេស​ជឿនលឿន​លើ​លោក​យើង​នេះ គេ​បាន​ឲ្យ​តម្លៃ​យ៉ាង​ខ្ពស់ ទៅ​លើ​បូរណភាព​ទឹក​ដី​របស់​គេ​។ កាល​ពី​ចុង​ខែ​ឧសភា​កន្លង​ទៅ​ថ្មី​ៗ​នេះ នៅ​ពេល​ប្រធានាធិបតី​ហ្វីលីពីន​បង្ហាញ​ពី​គំនិត​ទាមទារ​យក​កោះ Sabah ពី​ប្រទេស​ម៉ាឡេស៊ី​​មក​វិញ រដ្ឋ​មន្ដ្រី​ការបរទេស​ម៉ាឡេស៊ី​មិន​ត្រឹម​តែ​ចេញ​សេចក្ដី​ព្រមាន​ចំពោះ​បំណង​នេះ​ទេ ប៉ុន្តែ​ថែម​ទាំង​បាន​កោះ​ហៅ​ភារៈធារី​ហ្វីលីពីន​មក​សាកសួរ​ទៀត​ផង​។ ចំណែក​ប្រទេស​វៀតណាម និង​ហ្វីលីពីន ក្រៅ​ពី​ប្រើ​ប្រាស់​វិធានការ​ការទូត​ជាមួយ​ចិន​ហើយ នៅ​ក្នុង​សំណុំ​រឿង​ជម្លោះ​ដែន​ទឹក​ជាមួយ​ចិន​ហើយ ថែម​ទាំង​បាន​លើក​យក​បញ្ហា​នេះ ដាក់​ក្នុង​របៀប​វារៈ​នៃ​កិច្ច​ប្រជុំ​ថ្នាក់​តំបន់ ដើម្បី​ស្វែង​រក​ដំណោះ​ស្រាយ​ថែម​ទៀត​។

ចំណែក​ប្រទេស​កម្ពុជា​វិញ បាន​ត្រឹម​តែ​ធ្វើ​កំណត់​ទូត​តវ៉ា ដែល​ហាក់​ដូច​ជា​គ្មាន​ឥទ្ធិពល​អ្វី​ទាំង​អស់​ទៅ​លើ​ប្រទេស​វៀតណាម​។ ប្រឈម​នឹង​បញ្ហា​នេះ រដ្ឋាភិបាល​កម្ពុជា​ត្រូវ​បាន​គេ​មើល​ឃើញ​ថា ខ្វះ​ភាព​ម៉ឺងម៉ាត់ ក្នុង​ការ​ការពារ​បូរណភាព​ដែនដី​របស់​ខ្លួន​។ នៅ​ក្នុង​បញ្ហា​ព្រំដែន​កម្ពុជា​វៀតណាម ដែល​កំពុង​តែ​ពុះ​កញ្ជ្រោល​ឡើង​វិញ​នៅ​ពេល​នេះ កម្ពុជា​គួរ​តែ​រិះ​រក​មធ្យោបាយ​ប្រកប​ដោយ​ប្រសិទ្ធិភាព ដើម្បី​ដោះ​ស្រាយ​បញ្ហា​ជា​បន្ទាន់​។ ការ​លើក​យក​បញ្ហា​នេះ ទៅ​ពិភាក្សា​ក្នុង​កិច្ច​ប្រជុំ​គណៈកម្មការ​ព្រំដែន​រួម​រវាង​កម្ពុជា​វៀតណាម ត្រូវ​បាន​លើក​ទឹក​ចិត្ត​។ ហើយ​ប្រសិន​បើ​អាច​ធ្វើ​ទៅ​បាន​មែន​នោះ វា​នឹង​បង្ហាញ​ពី​កិច្ច​ខិត​ខំ​ប្រឹង​ប្រែង​របស់​រដ្ឋាភិបាល​កម្ពុជា ក្នុង​ការ​ការពារ​ដែន​អធិបតេយ្យ​របស់​ខ្លួន​។

បញ្ហា​ព្រំដែន​នៅ​តែ​ជា​ក្ដី​កង្វល់​នៅ​ឡើយ សម្រាប់​ប្រជាពលរដ្ឋ​ទូទៅ​ ជា​ពិសេស​សម្រាប់​គណបក្ស​ប្រឆាំង​។ គណបក្ស​ប្រឆាំង ដែល​តែង​តែ​​យក​បញ្ហា​ព្រំដែន​នេះ​មក​ធ្វើ​ជា​លេស ដើម្បី​​វាយ​ប្រហារ​គណបក្ស​កាន់​អំណាច​។ ហេតុ​ដូច្នេះ រដ្ឋាភិបាល​ត្រូវ​តែ​ពន្យល់​បង្ហាញ​ពី​គោលការណ៍ និង​នីតិវិធី​នៃ​ការ​កំណត់​បង្គោល​ព្រំដែន​ឲ្យ​បាន​ច្បាស់​លាស់ ប្រសិន​បើ​មាន​ការ​ចាំ​បាច់​។ ការ​សង្ស័យ មិន​ទុក​ចិត្ត និង​ការ​ចោទ​ប្រកាន់​នានា ច្បាស់​ណាស់​ថា​នឹង​នៅ​តែ​បន្ត​មាន​ ប្រសិន​បើ​គ្មាន​ការ​ដោះ​ស្រាយ​ប្រកប​ដោយប្រសិទ្ធិភាព និង​​តម្លាភាព​ទេ​នោះ​៕

ខែមិថុនា 17, 2015 at 8:07 ព្រឹក បញ្ចេញមតិ

ដំណើរនៃការសាបរលាបឥទ្ធិពលរបស់លោក ជា ស៊ីម

ដោយ៖ អ៊ឹម រចនា

លោក ជា ស៊ីម គឺ​ជា​អ្នក​នយោបាយ​ជាន់​ខ្ពស់ ដែល​បាន​តស៊ូ​រំដោះ​ជាតិ​កម្ពុជា ជាមួយ​មិត្ត​រួម​អាវុធ​ផ្សេង​ទៀត តាំង​ពីឆ្នាំ​១៩៤៧ ​​មក​ម្ល៉េះ​។ បើ​ទោះ​បី​ជា​លោក​បាន​ចំណាយ​ពេល​ជិត​៧០​ឆ្នាំ​ ដើម្បី​ជាតិ​និង​ប្រជាជន​ខ្មែរ ក៏​​ប៉ុន្តែ​កេរ្តិ៍​ឈ្មោះ​របស់​បុរស​រូប​នេះ ហាក់​មិន​មាន​ភាព​លេច​ធ្លោ​ជា​សាធារណៈ​គួរ​ឲ្យ​កត់​សម្គាល់​ឡើយ​។ មិន​លេច​ធ្លោ​ជា​សាធារណៈ ក៏​ប៉ុន្តែ​នៅ​ក្នុង​ជួរ​គណបក្ស​ប្រជាជន​កម្ពុជា លោក ជា ស៊ីម គឺ​ជា​ប្រធាន ដែល​ធ្លាប់​មាន​ឥទ្ធិពល​។ ប៉ុន្តែ​ឥទ្ធិពល​នោះ​បាន​សាប​រលាប​ទៅ​វិញ នា​ពេល​ក្រោយ​ៗ​មក​។

កើត​នៅ​ថ្ងៃ​ទី​១៥ ខែ​វិច្ឆិកា ឆ្នាំ​១៩៣២ នៅ​ស្រុក​រមាស​ហែក ខេត្ត​ស្វាយរៀង លោក ជា ស៊ីម បានលះ​បង់​យុវភាព​របស់​ខ្លួន​ស្ទើរ​តែ​ទាំង​ស្រុង ដើម្បី​​ចូល​រួម​នៅ​ក្នុង​ចលនា​តស៊ូ​ខ្មែរ​ឥស្សរៈ​ ដើម្បី​ឯករាជ្យ​ជាតិ ចាប់​តាំង​ពី​ឆ្នាំ​១៩៤៧​ដល់​ឆ្នាំ​១៩៥៤​​។ សកម្មភាព​តស៊ូ​របស់​លោក មាន​ជា​បន្ត​បន្ទាប់ ជា​ពិសេស​ចាប់​តាំង​ពី​ឆ្នាំ​១៩៧០​ដល់​ឆ្នាំ​១៩៧៥​។ ក្នុង​អំឡុង​ពេល​នោះ លោក ជា ស៊ីម បាន​ចូល​រួម​ជាមួយ​កង​ទ័ព​ខ្មែរ​ក្រហម ដើម្បី​ផ្ដួល​រំលំ​របប លន់ នល់​។ ហើយ​ក្រោយ​មក លោក​បាន​ឡើង​តំណែង​ជា​បន្ត​បន្ទាប់ ក្លាយ​ជា​ប្រធាន​ឃុំ ប្រធាន​ស្រុក នៅ​ភូមិភាគ​បូព៌ា​។

នៅ​ពេល​ខ្មែរ​ក្រហម​ធ្វើ​ការ​បោស​សម្អាត​ផ្ទៃ​ក្នុង នៅ​ភូមិភាគ​បូព៌ា ក្នុង​​ឆ្នាំ​១៩៧៨ ខ្មែរ​ក្រហម​ដែល​បះបោរ​ប្រឆាំង​នឹង ប៉ុល ពត បាន​មក​ជួប​ជុំ​គ្នា​នៅ​ស្រុក​ស្នួល ខេត្ត​ក្រចេះ​។ មហា​សន្និបាត​មួយ​បាន​រៀបចំ​ឡើង នៅ​ថ្ងៃ​ទី​០២ ខែ​ធ្នូ ឆ្នាំ​១៩៧៨ និង​បាន​សម្រេច​ជា​ឯកច្ឆ័ន្ទ បង្កើត​រណសិរ្ស​មាន​ឈ្មោះ​ថា រណសិរ្ស​សាមគ្គី​សង្គ្រោះ​ជាតិ​កម្ពុជា​។ រណសិរ្យ​នេះ មាន​លោក ហេង សំរិន ជា​ប្រធាន និង​មាន​គណៈកម្មាធិការ​មជ្ឈឹម​រណសិរ្ស​ដែល​​មាន​ទាំង​លោក ជា ស៊ីម លោក ប៉ែន សុវណ្ណ និង​លោក ហ៊ុន សែន ជា​សមាជិក​នៅ​ក្នុង​នោះ​ផង​។ 1606970_555393167888826_315470590_n ​​ទី​បំផុត រណសិរ្ស​សាមគ្គី​សង្គ្រោះ​ជាតិ​កម្ពុជា​ ក្រោម​ការ​ជួយ​ជ្រោម​ជ្រែង​ពី​វៀតណាម ​បាន​វាយ​រំលំ​របប​កម្ពុជា​ប្រជាធិបតេយ្យ​នៅ​ថ្ងៃ​ទី​០៧ ខែ​មករា ឆ្នាំ​១៩៧៩​។ ក្រោយ​ការវាយ​រំលំ​របប ប៉ុល ពត មាន​បញ្ហា​ជា​ច្រើន​បាន​ចោទ​ឡើង​។ ក្នុង​នោះ​​ក៏​មាន​ផង​ដែរ ការ​ប្រជែង​កម្លាំង​គ្នា​រវាង​ក្រុម​លោក ប៉ែន សុវណ្ណ មក​ពីហាណូយ និង​ក្រុម លោក ជា ស៊ីម ហេង សំរិន ដែល​ជា​អតីត​ខ្មែរ​ក្រហម​នៅ​ក្នុង​ស្រុក ​​ប្រឆាំង​នឹង ប៉ុល ពត។

នៅ​ក្នុង​រដ្ឋាភិបាល លោក ហេង សំរិន ដែល​តែង​តាំង​នៅ​ថ្ងៃ​ទី​៨ ខែ​មករា ឆ្នាំ​១៩៧៩ លោក ជា ស៊ីម ទទួល​បន្ទុក​ខាង​មហាផ្ទៃ​។ ប៉ុន្តែតំណែង​នេះ ត្រូវ​បាន​​​រដ្ឋាភិបាល​លោក ប៉ែន សុវណ្ណ ដែល​ឡើង​កាន់​កាប់​នា​ថ្ងៃ​ទី​២ ខែ​កក្កដា ឆ្នាំ​១៩៨១ ដក​ចេញ​ពី​លោក ជា ស៊ីម ដោយ​សារ​តែ​ក្ដី បារម្ភ​របស់​វៀតណាម និង​ដោយ​សារ​តែ​ទំនាស់​ប្រជែង​អំណាច​​​។ ជំនួស​មក​វិញ លោក ជា ស៊ីម បាន​ទទួល​មុខ​តំណែង​ជា​ប្រធាន​រដ្ឋសភា​​​​។ CG-C4EhUgAEVKAw ​ក្នុង​សៀវភៅ សុបិន​និង​ការពិត លោក វ៉ាន់ឌី កាអុន បាន​សរសេរ​ថា នៅ​ឆ្នាំ​១៩៩០ ពេល​ដែល​លោក ហ៊ុន សែន កំពុង​មាន​មុខមាត់ នៅ​ក្នុង​ការចរចា​ជាមួយ​សម្ដេច នរោត្តម សីហនុ លោក ជា ស៊ីម ក៏​គ្មាន​តួនាទី​អ្វី​សំខាន់​ដែរ ក្រៅ​ពី​មាន​ឈ្មោះ​ថា ជា អ្នក​តា​ចាំ​ស្រុក​ម្នាក់ ដែល​មាន​ការ​គោរព​ដ៏​ខ្ពង់​ខ្ពស់​ពី​សំណាក់​បក្ស​ប្រជាជន និង​លោក ហ៊ុន សែន​។ ​

លុះ​ពេល​មាន​​កិច្ច​​ព្រម​ព្រៀង​សន្តិភាព​ទីក្រុង​ប៉ារីស នៅ​ឆ្នាំ​១៩៩១ លោក ជា ស៊ីម បាន​ក្លាយ​ជា​ប្រធាន​គណបក្ស​ប្រជាជន​កម្ពុជា ជំនួស​លោក ហេង សំរិន​​។ ប៉ុន្តែ​តំណែង​នេះ គ្មាន​តួនាទី​អ្វី​សំខាន់​សោះ​។ ទោះ​បី​ជា​យ៉ាង​ណា​ក៏​ដោយ បើ​តាម​ការ​រៀបរាប់​របស់​លោក វ៉ាន់ឌី កាអុន លោក ជា ស៊ីម នៅ​តែ​បន្ត​ក្ដាប់​កម្លាំង​ផ្ទៃ​ក្នុង​មួយ​ភាគ​ធំ​ដដែល​ ហើយ​ការ​ប្រជែង​ដណ្ដើម​ឥទ្ធិពល​គ្នា​ដោយ​មិន​ចេញ​មុខ រវាង​លោក ហ៊ុន សែន និង​លោក ជា ស៊ីម នៅ​តែ​មាន​បន្ត​មក​ទៀត​។

cam-photo-chea-sim-inside1-reuters
ប្រវត្តិ​វិទូ លោក Evan Gottesman ក៏​បាន​លើក​ឡើង​ពី​ការ​ប្រជែង​អំណាច​រវាង​លោក ហ៊ុន សែន និង​លោក ជា ស៊ីម នៅ​ក្នុង​សៀវភៅ​របស់​ខ្លួន​ដែរ​។ លោក Gottesman បាន​អះអាង​ថា លោក ជា ស៊ីម ​ទទួល​បាន​ភក្ដីភាព​ខ្លាំង​ពី​សមាជិក​ជាន់​ខ្ពស់​នៃ​គណបក្ស​ប្រជាជន​កម្ពុជា​។ បើ​តាម​លោក Gottesman នៅ​ក្នុង​ចំណោម​អតីត​​មន្ដ្រី​ខ្មែរ​ក្រហម​ដែល​បាន​តស៊ូ​រំដោះ​កម្ពុជា គឺ​មាន​តែ​លោក ជា ស៊ីម ម្នាក់​គត់ ដែល​បាន​កសាង​គ្រឹះ​និង​ឥទ្ធិពល​មូលដ្ឋាន​យ៉ាង​រឹង​មាំ  នៅ​ក្នុង​ជួរ​គណបក្ស​។

យ៉ាង​ណា​ក៏​ដោយ លោក Gottesman បាន​កត់​សម្គាល់​ឃើញ​ថា ឥទ្ធិពល​និង​បណ្ដាញ​របស់​លោក ជា ស៊ីម ដែល​ជា​ក្រុម​និយម​កណ្ដាល ចាប់​ផ្ដើម​ថម​ថយ នៅ​ឆ្នាំ​១៩៩៤​ ប៉ុន្តែ​បើ​ទោះ​បី​ជាថយ​ចុះ​ខ្លះ ប៉ុន្តែ​មិន​បាន​បាត់​បង់​ទាំង​ស្រុង​ទេ​​។ 5447393E-6FC3-4AC4-9FB1-9D0212CAD3D8_w640_r1_s_cx0_cy2_cw0 ព័ត៌មាន​ស្ដី​ពី​ការ​ប្រជែង​អំណាច​នៅ​ក្នុង​ជួរ​គណបក្ស​ប្រជាជន​កម្ពុជា ត្រូវ​បាន​ប្រវត្តិវិទូ និង​អ្នក​វិភាគ​នយោបាយ​លើក​ឡើង​ជា​យូរ​មក​ហើយ ប៉ុន្តែ​មន្ដ្រី​ជាន់​ខ្ពស់​នៃ​គណបក្ស​នេះ មិន​ដែល​ទទួល​ស្គាល់​ទេ​។ នៅ​ ​ពេល​ដែល លោក ជា ស៊ីម ទទួល​មរណភាព មន្ដ្រី​នៃ​គណបក្ស​នេះ​​បាន​អះអាង​ពី​ភាព​រឹង​មាំ​នៃ​គណបក្ស​ខ្លួន តាំង​ពី​ថ្នាក់​មូលដ្ឋាន ដល់​ថ្នាក់​កំពូល​ទៀត​ផង​​។

សម្រាប់​អ្នក​វិភាគ​នយោបាយ​ឯករាជ្យ​មួយ​ចំនួន​វិញ​ មរណភាព​នៃ​លោក ជា ស៊ីម នឹង​មិន​ធ្វើ​ឲ្យ​បក្ស​ប្រជាជន​រង្គោះ​រង្គើ​ទេ​។ ព្រោះ​បើ​តាម​ក្រុម​អ្នក​វិភាគ​នេះ ការ​ប្រជែង​ដណ្ដើម​អំណាច​គ្នា​សម្រាប់​បុរស​ខ្លាំង​នៃ​បក្ស​ប្រជាជន ហាក់​ដូច​ជា​កន្លង​ទៅ​ឆ្ងាយ​ហើយ​។ នៅ​ពេល​ដែល​មាន​វ័យ​កាន់​តែ​ចាស់ អ្នក​ជំនាន់មុន​​នៃ​បក្ស​នេះ​ទាំង​អស់​ គ្រាន់​តែ​ព្យាយាម​ជួយ​ជ្រោមជ្រែង​គ្នា ដើម្បី​ជាតិ និង​ជា​ពិសេស ដើម្បី​​អ្នក​ជំនាន់​ក្រោយ​របស់​គណបក្ស​ខ្លួន​៕​

ខែមិថុនា 10, 2015 at 12:05 ល្ងាច បញ្ចេញមតិ

ថ្មី​ៗ៖ លក្ខខណ្ឌ​ការងារ​របស់​អ្នកកាសែត​នៅមានកម្រិត មិនមាន​សន្ទុះ​ដូច​វិស័យ​នេះឡើយ

ភ្នំពេញ៖ បើទោះបីជា​នៅ​ប៉ុន្មាន​ឆ្នាំ​ចុងក្រោយ​នេះ ​វិស័យ​សារព័ត៌​មាននៅ​កម្ពុជា​ហាក់​មាន​សន្ទុះ​ខ្លាំង​ក៏ដោយ​ ប៉ុន្តែ​អ្នកសារព័ត៌មាន​នៅតែ​លើកឡើងថា​លក្ខខណ្ឌ​ការងារ​នៅក្នុង​វិស័យ​មួយ​នេះ​នៅមានកម្រិត ហើយ​ប្រឈមមុខ​នឹង​បញ្ហា​ជាច្រើន​ដូចជា ការគំរាមកំហែង​ អំពើហិង្សា ​និង​ខ្វះ​ការយកចិត្តទុកដាក់​ពី​ស្ថាប័ន ​និង​ការគាំទ្រ​ពី​សង្គម។
លោក ធឿន បញ្ញា​ឬ​ទ្ធិ អ្នកសារព័ត៌មាន​រប​ស់​គេហទំព័រ​ព័ត៌មាន​អេ​ឡិ​ក​ត្រូ​និកថ្មីៗ បាន​បញ្ជាក់ថា៖«បញ្ហា​ប្រឈម​របស់​អ្នកសារព័ត៌មាន​នៅតែមាន​ដូចជា​ការផ្តល់​បៀវត្ស​ទាប តែ​ការងារ​ច្រើន រង​សម្ពាធ ឬ​អំពើហិង្សា​ពី​អាជ្ញាធរ»។ លោក​ធឿន បញ្ញា​ឬ​ទ្ធិ បាន​ពន្យល់ថា ​ស្ថាប័ន​ខ្លះ​ផ្តល់​បៀវត្ស​មិន​សមរម្យ ហើយ​សម្ពាធ​ការងារ​ច្រើន​។ ​លោកបន្តថា ពេល​ចុះ​ទៅយក​ព័ត៌មាន​ទាក់ទង​នឹង​ការធ្វើ​បាតុកម្ម ឬ​ការតវ៉ា​នានា​ វានៅមាន​ការរារាំង​ពី​អាជ្ញាធរ​មិន​ឲ្យ​អ្នកសារព័ត៌មាន​ចូលយកព័ត៌មាន។ «ហើយបើសិនជាមានការ​ប៉ះទង្គិច​រវាង​អ្នក​តវ៉ា​និង​អាជ្ញាធរ ​អ្នកសារព័ត៌មាន ក៏​អាចជា​ជនរងគ្រោះ​ម្នាក់​ផងដែរ​ ឧទាហរណ៍ ដូច​កាលពី​ខែឧសភា​ឆ្នាំ២០១៤កន្លងទៅ អ្នកសារព័ត៌មាន​ម្នាក់​ត្រូវបាន​អាជ្ញាធរ​វាយ​ដល់​សន្លប់​ជាដើម​ដែល​នេះ​បង្ហាញ​ឲ្យ​ឃើញថា​អ្នកសារព័ត៌មាន​នៅ​មិនទាន់មាន​ការគាំទ្រ​គោរព និង​ឲ្យ​តម្លៃ​ពី​សង្គម»។ នេះជាការ​កត់សម្គាល់របស់​លោក បញ្ញាឬទ្ធិ។

ចំណែក​កញ្ញា ​អ៊ឹម ​រចនា ដែល​បច្ចុប្បន្ន​ជា​សហ​និពន្ធ​នាយករង​នៅ​វិទ្យុ​បារាំង​អន្តរជាតិ​RFIវិញ កញ្ញាបានយល់ឃើញថា ​លក្ខខណ្ឌ​ការងារ​របស់​អ្នកកាសែត​ខ្មែរ​នៅមានកម្រិត​ទាំង​ម៉ោង​ពេល​នៃ​ការធ្វើការងារច្រើន​ ទាំង​ប្រាក់បៀវត្ស និង​ការធានារ៉ាប់រង​ជាដើម។

កញ្ញា​រចនា ដែល​ប្រឡូក​ក្នុង​អាជីព​ជា​អ្នក​សារព័ត៌​ប្រមាណ៤ឆ្នាំ​មកហើយ​នោះ​ក៏បាន​ពន្យល់​យ៉ាង​ដូច្នេះ​ថា៖«ការងារ​អ្នកកាសែត គឺ​ខុសពី​ការងារ​ផ្សេង។ ​អ្នកកាសែត​ធ្វើការ​មិនមាន​ពេលវេលា​ច្បាស់ ​គួបផ្សំ​នឹង​ទំនួល​ខុសត្រូវ ​និង​កាតព្វកិច្ច​របស់ខ្លួន​ផង ​ពេលខ្លះ​ត្រូវ​ធ្វើការ​លើសពី៨ម៉ោង។ ​ដូច្នេះ​ស្ថាប័ន​កាសែត ក៏ត្រូវ​ផ្តល់ប្រាក់​បៀវត្ស​សមរម្យ​ដល់​បុគ្គលិក​ឲ្យ​សមាមាត្រ​នឹង​ទំហំ​ការងារ ​និង​ការទទួលខុសត្រូវ​ ​ខណៈ​បច្ចុប្បន្ន​ទីផ្សារការងារ​របស់​អ្នកកាសែត​មាន​ភាព​រីកចម្រើន។ ហើយ​ការធានារ៉ាប់រង​គឺជា​រឿង​ចាំបាច់​ ព្រោះ​អ្នកកាសែត​អាចប្រឈម​នឹង​ការគំរាមកំហែង​ ឬ​រងរបួស ពេល​ចុះ​ទៅយក​ព័ត៌មាន​ទាក់ទង​នឹង​បាតុកម្ម​ជាដើម»។

ក្នុងនាម​ជា​អ្នកសារព័ត៌មាន​មួយរូប​កញ្ញា​រចនា​ក៏​ទាមទារ​ឲ្យ​ក្លិប​អ្នកកាសែត​កម្ពុជា ពង្រឹង​​វិធាន​ការការពារអ្នកកាសែត ​ក្រៅតែពី​ការចេញ​សេចក្តីថ្លែងការណ៍​ ឬក៏​បង្កើត​ក្រុមអ្នកច្បាប់​ដើម្បី​ការពារ​អ្នកកាសែត​ណា​ម្នាក់​ដែល​រង​ការគំរាមកំហែង ​ឬ​រំលោភបំពាន។ សម្រាប់កញ្ញា ​ការចេញ​សេចក្តីថ្លែងការណ៍​មិនអាច​ជួយ​អ្វី​បាន​នោះទេ។

មិន​ខុសពី អ្នកសារព័ត៌មាន​ទាំង២រូប​ខាងលើ​ដែរ ​លោក​ តាំង ​វី​ដា ​អ្នកសារព័ត៌មាន​របស់​កាសែត​ភ្នំពេញ​បុ​ស្តិ៍​ក៏បាន​គូសបញ្ជាក់​ពី​លក្ខខណ្ឌ​ការងារមិនសមរម្យ​របស់អ្នកកាសែតខ្មែរដែរ។ លោក​ វី​តា​ បាន​ថ្លែងថា៖« អ្នកកាសែត​យើង​​ប្រឈម​ទី១ គឺ​សុវត្ថិភាព​ និង​ការរើសអើង។ ​ឧទាហរណ៍​ ​យើង​ចង់​គ្រាន់តែ​ប្រាប់ថា​យើង​មកពី​ស្ថាប័ន​ណាមួយ​ គេ​មិន​ផ្តល់​ការអត្ថាធិប្បាយ​ជាដើម។ ​ទី២ គឺ​ម៉ោង​ពេលធ្វើ​ការងារ​មិន​ទៀងទាត់ ​ហើយ​ប្រាក់បៀវត្ស​នៅមានកម្រិត​នៅតាម​ស្ថាប័ននីមួយៗ ហើយ​នេះ​ជាហេតុ​ផល​មួយ ដែល​ធ្វើ​ឲ្យ​មតិ​មួយចំនួន​​នៅតែ​រិះគន់ថា​ អ្នកកាសែត​ក៏​ជា​ចំណែក​មួយ​ដែល​នាំ​ឲ្យ​មាន​អំពើ​សូកប៉ាន់។ ​ព្រោះ​ពេល​គាត់​ទៅយក​ព័ត៌មាន​គាត់​មិន​យកតែ​ព័ត៌មាន ប៉ុន្តែ​គាត់​ទៅយក​ទាំង​ស្រោមសំបុត្រ​មកទៀត​ ហើយ​វា​ធ្វើ​ឲ្យ​អ្នកកាសែត​ធ្វើការ​ដោយ​មិនមាន​ភាព​ឯករាជ្យ»។

អ្នកកាសែត​រូបនេះ​ក៏​ជំរុញ​ឲ្យ​ស្ថាប័ន​កាសែត​​យកចិត្តទុកដាក់​ជាមួយ​បុគ្គលិក​របស់ខ្លួន​ច្រើនជាង​នេះ ​ពីព្រោះ​ពេលខ្លះ​ពេល​អ្នកកាសែត​ចុះ​ទៅយក​ព័ត៌មាន​ឬ​ជួបនឹង​បញ្ហា​អ្វីមួយ គឺ​មិនបាន​ប្រាប់​ទៅ​ថ្នាក់លើ​ឡើយ។ ហើយ​អ្វីដែល​សំខាន់​ថ្នាក់​លើក​ក៏​មិន​ដែរ​សួរនាំ​ពី​បញ្ហា​នេះ​ទៅទៀត​។ ដូច្នេះ​ ចំពោះ​លោក វីតា ប្រការនេះ​ធ្វើ​ឲ្យ​អ្នកកាសែត​ខ្លួនឯង​យល់​ថាបើ​ស្ថាប័ន​របស់ខ្លួន មិនសូវ​យកចិត្តទុកដាក់ និង​ឲ្យ​តម្លៃ​បុគ្គលិក​របស់ខ្លួន​ តើ​អ្នកណា​គេ​ឲ្យ​តម្លៃ និង​យល់​ពី​អាជីព​ជា​អ្នកកាសែត​នេះ?

ពាក់ព័ន្ធ​នឹង​បញ្ហា​នេះ​លោក ​ប៉ែន​ បូ​ណា ​ប្រធាន​ក្លិប​អ្នកកាសែត​កម្ពុជា​បាន​មានប្រសាសន៍ថា​ បើទោះបីជា​បច្ចុប្បន្ន​ទីផ្សារ​ក្នុង​អាជីព​ជា​អ្នកសារព័ត៌មាន​នេះ​មាន​ភាព​រីកចម្រើន ប៉ុន្តែ​លក្ខខណ្ឌ​ការងារ​របស់​អ្នកកាសែត​គឺ​ស្ថិតនៅក្នុង​កម្រិត​មួយ​ទៅតាម​ស្ថាប័ននីមួយៗ​។ លោក ប៉ែន បូណា ពន្យល់​យ៉ាង​ដូច្នេះថា៖«ការងារ​អ្នកកាសែត​គ្មាន​ម៉ោង​ពេល​ច្បាស់លាស់​។​ពេល​បុណ្យទាន​ខ្លះ​មិនបាន​ឈប់ ​បៀវត្ស​និង​ការធានារ៉ាប់រង​ក៏​មិនទាន់​សមរម្យ​នៅក្នុង​ស្ថាប័ននីមួយៗ»។លោក​បាន​អត្ថាធិប្បាយបន្ថែម​ថា ជាទូទៅ​ម៉ោង​ការងារ​អ្នកកាសែត​មិន​ទៀងទាត់​ពេលខ្លះ​អ្នកកាសែត​ត្រូវ​រត់តាម​ព័ត៌មាន​មិនបាន​ឈប់សម្រាក​ពេញលេញពេល​បុណ្យទាន​ ហើយថា​ប្រាក់បៀវត្ស​នៅ​ទាប ​ដូច្នេះលោកចង់ឲ្យ​​ស្ថាប័ន​ព័ត៌មាន​ត្រូវតែ​គិតគូរ​ពី​បញ្ហា​នេះ​ឡើងវិញ​។ ប្រធាន​ក្លិបអ្នកកាសែត​ក៏បាន​អំពាវនាវដល់​​ស្ថាប័ន​កាសែតនីមួយៗឲ្យបណ្តុះ​ធនធានមនុស្ស​របស់ខ្លួន​ឲ្យ​មាន​សមត្ថភាព​ដែរ​និង​បំពេញការងារ​ប្រកបដោយ​វិជ្ជាជីវៈ​ផងដែរ។

ដោយឡែក​ទាក់ទង​នឹង​ការទាមទារ​ចង់​ឲ្យ​បង្កើតជា​សហជីព​ក្នុង​គោលដៅ​ការពារ​សិទ្ធិសេរីភាព​របស់​អ្នកកាសែត​ពី​ការរំលោភបំពានផ្សេងៗ លោក​ប្រធាន​ក្លឹប​អ្នកកាសែត​កម្ពុជា​បាន​បញ្ជាក់ថា កន្លងមក​ក្លឹប​អ្នកកាសែត​កម្ពុជា​បានធ្វើ​ការងារ​ច្រើន​ដើម្បី​ការពារ​ផលប្រយោជន៍​របស់​អ្នកកាសែត​ ហើយ​នៅ​អណ​ត្តិ​ថ្មី​នេះ​ក្លឹប​អ្នកកាសែត​កម្ពុជា​កំពុង​គិតគូរ​ពី​លទ្ធភាព​នៃ​ការបង្កើត​សហជីព​នេះ​ដើម្បី​ការពារ​ផលប្រយោជន៍​ភាគី​ទាំងសងខាង​គឺ​ទាំង​និយោជិត​និង​និយោជក។

បើតាម​របាយការណ៍រ​បស់​អង្គការ​អាដហុក ពី​ឆ្នាំ២០១២ដល់​ឆ្នាំ២០១៥មាន​អ្នកកាសែត​១៣នាក់​ត្រូវបាន​សម្លាប់​និង២៥នាក់​បាន​រង​នូវ​ការគំរាមកំហែង៕

ខែ​ឧសភា 2, 2015 at 9:47 ព្រឹក បញ្ចេញមតិ

ថ្មី​ៗ៖ នរណា​ខ្លះ ជា​មេដឹកនាំ​បណ្តាញ​ព័ត៌មាន​ដែលមាន​ឥទ្ធិពល​នៅ​កម្ពុជា​នៅ​ឆ្នាំ២០១៥ ?

ភ្នំពេញ៖ ការងារ​នៅក្នុង​ពិភព​សារព័ត៌មាន​នៅក្នុង​ប្រទេស​កម្ពុជា​មានការ​ប្រែប្រួល​យ៉ាងខ្លាំង​នៅ​ឆ្នាំ២០១៥នេះ។ មេដឹកនាំ​ស្ថាប័ន​សារព័ត៌មាន និង​អ្នកសារព័ត៌មាន​មួយចំនួន​បានធ្វើការ​ផ្លាស់ប្តូរ​តួនាទី ឬ​បានធ្វើការ​ផ្លាស់ប្តូរ​ស្ថាប័ន​ការងារ​តែម្តង។ តើនរ​ណាខ្លះ​ជា​មេដឹកនាំ​បណ្តាញ​ព័ត៌មាន​កម្ពុជា​នៅ​ឆ្នាំ២០១៥?

ការប្រែប្រួល​នៅក្នុង​វិស័យ​សារព័ត៌មាន​ខ្មែរ​នៅពេលនេះ គឺ​ដោយសារ​តម្រូវការ​រប​ស់​អ្នកអាន អ្នក​ស្តាប់ និង​អ្នកទស្សនា​មាន​ការវិវត្ត។ ដូច្នេះ​ចង់ ឬ​មិន​ចង់ អ្នក​ផលិត​ព័ត៌មាន​ត្រូវតែ​ធ្វើការ​កែទម្រង់។ ការប្រែប្រួល​មួយទៀត គឺ​ទាក់ទង​នឹង​កា​ផ្លាស់ប្តូរ​តំណែង ឬ​ផ្លាស់ប្តូរ​ស្ថាប័ន​របស់​អ្នកសារព័ត៌មាន​នាពេល​ចុង​ក្រោយនេះ។ ក្រោយ​មរណៈភាព​លោក ប៉ែន សមិទ្ធិ និពន្ធ​នាយក​រស្មី​កម្ពុជា និង​ជា​ប្រធាន​ក្លិប​អ្នកកាសែត​កម្ពុជា និង​ស្របពេល​នៃ​ការបង្កើត​ទូរទស្សន៍​ថ្មី PNN ថ្នាក់ដឹកនាំ​កាសែត និង​អ្នកកាសែត​មួយចំនួនធំ​ត្រូវ​ផ្លាស់ប្តូរ​តំណែង ឬ​ផ្លាស់ប្តូរ​ស្ថាប័ន​សារព័ត៌មាន​ជា​បន្តបន្ទាប់​គ្នា ដោយ​ចំហ និង​ដោយ​សម្ងាត់។

ក្រោយ​មរណៈភាព​លោក ប៉ែន សមិទ្ធិ ក្លិប​អ្នកកាសែត​គ្រោង​នឹង​បោះឆ្នោត​ជ្រើសរើស​ប្រធាន​ថ្មី និង​គណៈកម្មាធិការ​នា​យក​ថ្មី​នៅ​ចុងខែ​មេសា​ឆ្នាំ២០១៥នេះ។ នៅឯ​កាសែត​រស្មី​កម្ពុជា​ឯណោះ​វិញ លោក ទាវ សារៈ​មុន្នី ដែល​ធ្លាប់ជា​និពន្ធ​នាយករង​នៃ​កាសែត​រស្មី​កម្ពុជា ត្រូវបានតែងតាំង​ជា​ផ្លូវការ ជា​និពន្ធ​នាយក​កាសែត​រស្មី​កម្ពុជា​ចាប់ពីពេលនេះ​តទៅ។
កាសែត​ភ្នំពេញ​ប៉ុស្តិ៍​ជា​ភាសា​ខ្មែរ​គ្រប់គ្រង​ដោយ​លោក កៃ គឹម​សុង។

លោក ប៉ែន បូ​ណា ដែល​បាន​ចាក​ចេញពី​វិទ្យុ​បារាំង RFI នៅ​ឆ្នាំ២០១៥នេះ ត្រូវបានតែងតាំង​ជា​ប្រធានស្តីទី​នៃ​ក្លិប​អ្នកកាសែត​កម្ពុជា​ដោយ​រង់ចាំ​ការបោះឆ្នោត​ថ្មី​នៅ​ចុងខែ​មេសា២០១៥នេះ។ ស្របពេល​ជាមួយគ្នា លោក ប៉ែន បូ​ណា ដែល​គេ​ធ្លាប់​ស្គាល់​ថា ជា​អ្នកវិភាគ​ឯករាជ្យ​នោះ ត្រូវបានតែងតាំង​ជា​និពន្ធ​នាយក​ព័ត៌មាន​នៃ​ទូរទស្សន៍​ថ្មី«PNN»។
នៅឯ​វិទ្យុ​បារាំង​ឯណោះ​វិញ កញ្ញា អ៊ឹម រចនា និង​លោក ញឹម សុផល អតីត​អ្នកយកព័ត៌មាន​វិទ្យុ​បារាំង ត្រូវបាន​ក្រុមហ៊ុន​តែងតាំង​ជា​និពន្ធ​នាយករង​នៃ​វិទ្យុ​អន្តរជាតិ​មួយ​នេះ។ នេះ​បើ​យោងតាម​ប្រភពពី​បុគ្គលិក​វិទ្យុ​បារាំង​នៅ​ទីក្រុង​ភ្នំពេញ។ ប្រភព​ដដែល​បាន​អោយដឹងទៀតថា លោក ហ្ស​ង់ ហ្វ្រ​ង់​ស័​រ​តាន់ អ្នកវិភាគ​ព្រឹត្តិការណ៍​អន្តរជាតិ​ដ៏​ល្បីល្បាញ​នោះ នឹង​បន្ត​ដឹកនាំ​វិទ្យុ​បារាំង​ក្នុងនាម​ជា​និពន្ធ​នាយក​ក្នុងពេល​បច្ចុប្បន្ននេះ។

នៅ​វិទ្យុ​សំឡេង​សហរដ្ឋអាមេរិក​ឯណោះ​វិញ លោក គង់ សុ​ឋាន​រិ​ទ្ធ អតីត​អ្នក​ឆ្លងឆ្លើយ​ព័ត៌មាន​របស់​វិទ្យុ​បារាំង កំពុងកាន់​តួនាទី​ជា​អ្នកសម្របសម្រួល​នៃ​វិទ្យុ​មួយ​នេះ រហូតដល់​ចុងខែ​មេសា​នេះ។ លោក គង់ សុ​ឋាន​រិ​ទ្ធ គ្រោង​ឈប់​ពី​ការងារ​ជា​អ្នកកាសែត។ វិទ្យុ​ដែល​គាំទ្រ​ហិរញ្ញវត្ថុ​ដោយ​សហរដ្ឋអាមេរិក​មួ​យ​ទៀត គឺ​វិទ្យុ​អាស៊ីសេរី​ប្រចាំ​ប្រទេស​កម្ពុជា កំពុង​ត្រូវ​ដឹកនាំ​ដោយ​លោក ជុន ចាន់​បុត្រ។ វិទ្យុសំឡេង​ប្រជាធិបតេយ្យ VOD គ្រប់គ្រង​ដោយ​លោក ណុប វី។ នៅឯ​វិទ្យុ​ស្ត្រី ១០២ ឯណេះ​វិញ លោក ទួន សុផល ដែល​ធ្លាប់ជា​អ្នកកាសែត​ត្រូវបានតែងតាំង​ជា​ប្រធាន​ក្រុម​ព័ត៌មាន​នៃ​វិទ្យុ FM ១០២ ។

នៅឯ​ទូរទស្សន៍ CNC លោក ហ៊ុយ វណ្ណៈ មាន​តួនាទី​ជា​អគ្គនាយករង ទទួលបន្ទុក​ព័ត៌មាន​នៃ​ទូរទស្សន៍​ដ៏​ល្បី​មួយ​នេះ។ លោក នៅ សុ​ភ័ស្ស ជា​និពន្ធ​នាយក​ព័ត៌មាន​នៃ​ទូរទស្សន៍ CTN។ លោក មាស ឫទ្ធី ដែល​បាន​ចូលរួម​ប្រឡូក​ក្នុង​វិស័យ​សារព័ត៌មាន​អស់​រយៈពេល​ជិត២០ឆ្នាំ​មកហើយ​នោះ ទទួលបាន​តំណែង​អគ្គនាយករង​ទទួលបន្ទុក​ផ្នែក​ព័ត៌មាន​នៃ​ទូរទស្សន៍ ហង្ស​មាស នាពេល​បច្ចុប្បន្ននេះ។

ងាក​មក​និយាយ​ពី​សារព័ត៌មាន​អេឡិចត្រូនិក​វិញ។ លោក សយ សុភាព ដែល​មហាជន​ភាគច្រើន​ស្គាល់​នោះ គឺជា​ម្ចាស់ និង​ជា​អគ្គនាយក​នៃ​មជ្ឈមណ្ឌល​សារព័ត៌មាន​ដើមអម្ពិល។ លោក លាង ដឺ​លុច អតីត​និពន្ធ​នាយករង​វិទ្យុ​បារាំង​អន្តរជាតិ កំពុងកាន់​តំណែង​ជា​និពន្ធ​នាយក​សារព័ត៌មាន​អេឡិចត្រូនិកថ្មីៗ ។ សារព័ត៌មាន​ថ្មី​នាពេល​បច្ចុប្បន្ននេះ មាន​ពីរ​ភាសា គឺ​ភាសា​ខ្មែរ និង​ភាសា​ជប៉ុន។ ប៉ុន្តែ​នៅពេលឆាប់ៗខាងមុខនេះ សារព័ត៌មានថ្មីៗនឹង​បង្កើតជា​ភាសា​អង់គ្លេស និង​ភាសា​បារាំង​បន្ថែមទៀត។

ងាក​មក​និយាយ​ពី​ទីភ្នាក់ងារ​ព័ត៌មាន​បរទេស​នៅ​កម្ពុជា​វិញ លោក ពុ​យ គា សមាជិក​គណៈកម្មាធិកា​រ​នាយក​ក្លិប​អ្នកកាសែត​កម្ពុជា គឺជា​អ្នកឆ្លើយឆ្លង​ព័ត៌មាន​នៃ​ទីភ្នាក់ងារ​ជប៉ុន Kyodo ប្រចាំ​នៅក្នុង​ប្រទេស​កម្ពុជា។ លោក ប្រាក់ ចាន់ធុល គឺជា​អ្នកឆ្លើយឆ្លង​ព័ត៌មាន​នៃ​ទីភ្នាក់ងារ​អង់គ្លេស Reuters។ លោក ស៊ុយ សែ គឺជា​អ្នក​ឆ្លងឆ្លើយ​ព័ត៌មាន​នៃ​ទីភ្នាក់ងារ​ព័ត៌មាន​បារាំង AFP ប្រចាំ​នៅ​កម្ពុជា។ លោក ជាង សុ​ផេង គឺជា​អ្នក​ឆ្លងឆ្លើយ​ព័ត៌មាន​នៃ​ទីភ្នាក់ងារ​អាមេរិក AP ប្រចាំ​នៅ​កម្ពុជា។

លោក ឆាយ សុផល សមាជិក​គណៈកម្មាធិកា​រ​នាយក​នៃ​ក្លិប​អ្នកកាសែត​កម្ពុជា គឺជា​សាស្ត្រាចារ្យ​សារព័ត៌​មាននៅ​សកល​វិទ្យាល័យ​ភ្នំពេញ​ផ្នែក​ប្រព័ន្ធ​ផ្សព្វផ្សាយ D M C។

ក្នុងខណៈពេល​ដែលមាន​ការតែងតាំង​មេដឹកនាំ​ថ្មី​នៃ​ស្ថាប័ន​សារព័ត៌មាន​នោះ គេ​ក៏​សង្កេតឃើញ​មាន​អ្នកសារព័ត៌មាន​ជាច្រើន​នាក់ បានសម្រេច​ចិត្ត​ចាក​ចេញពី​ស្ថាប័ន​ព័ត៌មាន​មួយ​ទៅ​ស្ថាប័ន​ព័ត៌មាន​មួយ​ផ្សេងទៀត ក្រោម​ហេតុផលផ្សេងៗគ្នា ក្នុងនោះ​មាន៖ បរិយាកាស​ការងារ បញ្ហា​ប្រាក់ខែ និង​លទ្ធភាព​នៃ​ការទទួលបាន​បទពិសោធ​ន៍​ពី​ការងារ​ថ្មី៕

ខែ​មេសា 11, 2015 at 9:15 ព្រឹក បញ្ចេញមតិ

អត្ថបទ​ចាស់​ជាង​នេះ​


ការបន្ទាន់សម័យ Twitter

Instagram

ខែតុលា 2017
អា ព្រ សុ
« កញ្ញា    
1234567
891011121314
15161718192021
22232425262728
293031  

បណ្ណសារ


%d bloggers like this: