Archive for ខែធ្នូ, 2018

២០១៨៖ ស្ងប់សុខ​​ជា​អ្វី មិន​ដែល​ស្គាល់..

មិន​ធ្ងន់​ធ្ងរ​ដូច​គ្រោះ​ធម្មជាតិ​នៅ​ឥណ្ឌូនេស៊ី​ទេ ប៉ុន្តែ​ជីវិត​ឆ្នាំ​នេះដូច​រលក​សមុទ្រ.. ស្ងប់​សុខ​ជា​អ្វី មិន​ដែល​ស្គាល់! ​ម្យ៉ាង​ដែរ.. មិន​សូវ​ស្ងប់ តែ​​មាន​ភ្លេង​រលក​សមុទ្រ​កំដរ!

20181227-photo_2018-12-27_14-04-29

អាជីព

មិន​ខុស​ពី​រាល់​ដង​ទេ ឆ្នាំ​បោះ​ឆ្នោត សម្រាប់​អាជីព​កាសែត គឺ​តែង​តែ​តឹងតែង​​ជាង​រាល់​ដង​។ វិទ្យុ​យើង​សំណាង​ដែល​ថ្ងៃ​បោះ​ឆ្នោត នៅ​អាច​ដំណើរការ។ មិន​ដោយ​រលូន​ល្អ​ទេ តែ​យ៉ាង​ហោច​ណាស់ យើង​មាន​ឱកាស មាន​ដង្ហើម​ដក ដើម្បី​បន្ត​ផ្ដល់​ព័ត៌មាន​ដល់​អ្នក​ស្ដាប់​ លុះ​ដល់​ចប់​បោះ​ឆ្នោត។

រហូត​មក​ទល់​ពេល​នេះ អ្វី​ៗ​ធូរ​ច្រើន​ហើយ។ សង្ឃឹម​ថា ពី​ពេល​នេះ​ទៅ​មុខ អ្វី​ៗ​នឹង​បន្ត​ធូរ​ស្រាល​ថែម​ទៀត..​ សម្រាប់​ទាំង​អស់​គ្នា!

ឆ្នាំ​នេះ​ដែរ ខ្ញុំ​មាន​សំណាង​បាន​ក្លិប​អ្នក​កាសែត​ទុក​ចិត្ត​ហៅ​ទៅ​ប្រើ​បាន​ច្រើន​ជាង​ឆ្នាំ​មុន​ៗ​។ ខ្ញុំ​ដឹង​គុណ​រៀម​ច្បង​នៅ​ក្លិប ដែល​បណ្ដុះ​បណ្ដាល និង​រាប់​អាន ហើយ​មិន​ដែល​បោះ​បង់ បើ​ទោះ​បី​ជា​ស្ថានភាព​ខ្ញុំ​មិន​សូវ​នឹងនរ​ក្ដី​។ ឆ្នាំ​ក្រោយ មាន​រឿង​អ្វី​កើត​ឡើង​ក៏​ដោយ ខ្ញុំ​សង្ឃឹម​ថា ខ្ញុំ​នឹង​អាច​បន្ត​ជួយ​ក្លិប រាប់​តាំង​ពី​ការងារ​ស្រាល ដល់​ការងារ​ធ្ងន់​។ នោះ​ជាអ្វី​ដែល​ខ្ញុំ​ប៉ង​ចង់​ធ្វើ និង​នឹង​ធ្វើ​ពេល​ឱកាស​មក​ដល់…

Bipolar

ខ្ញុំ​ទើប​តែ​បាន​ដឹង​ខ្លួន​ថា ខ្ញុំ​មាន​ជំងឺ Bipolar (ដូច​តួ​ស្រី​ក្នុង​រឿង វិប្បល្លាស រចនា) តែ​កម្រិត​ទី​២ ដែល​ឡើង​ចុះ​យឺត​​មែន​ទែន.. កុំ​ថា​ឡើយ​សង្គម តែ​ខ្ញុំ​ដែល​ជា​អ្នក​ជំងឺ​ក៏​មិន​យល់​ពី​ជំងឺ​ខ្លួន​ឯង​ដែរ​។ ពេល​ដែល​ពេទ្យ​ធ្វើ​តេស្តន៍​ដំបូង​ៗ ខ្ញុំ​ចាយ​ពេល​សឹង​តែ​រាប់​សិប​ម៉ោង​សិក្សា​ពី Bipolar, សិក្សា​ពី​ជំងឺ, សិក្សា​ពី​វិធី​ព្យាបាល, សិក្សា​ពី​ថ្នាំ​ដែល​ខ្លួន​​ឯង​លេប​រាល់​ថ្ងៃ​អត់​មិន​បាន។

ខ្ញុំ​សំណាង​ដែល​មាន​គ្រួសារ និង​អ្នក​ជុំ​វិញ​ខ្លួន​យល់​ពី​ខ្ញុំ​។ ជា​ការ​ពិត គេ​ពិបាក​នឹង​យល់​ពី​ជំងឺ​ដែល​សូម្បី​តែ​ខ្ញុំ​ខ្លួន​ឯង​ក៏​មិន​យល់​នុះ​ណាស់, ប៉ុន្តែ​យ៉ាង​ហោច​ណាស់ ទាំង​អស់​គ្នា​ស្ដាប់ ផ្ដល់​ឱកាស និង​យោគយល់​ដល់​ខ្ញុំ​។ ស្រមៃ​មើល មនុស្ស​ម្នាក់​ដែល​មិន​យល់​ពី​ខ្លួន​ឯង​ផង តើ​គេ​នឹង​រស់​នៅ​ពិបាក​បែប​ណា​បើ​គ្មាន​អ្នក​យល់​យោគ​ពី​ខ្លួន​គេ​ទៀត? អ៊ីចឹង​ទើប​ខ្ញុំ​ថា ខ្ញុំ​សំណាង!

ជំងឺ​ខ្ញុំ​មិន​ទាន់​ធូរ​ស្រាល​ទេ នៅ​ឡើង​ចុះ​ដូច​រលក​សមុទ្រ និង​ដូច​ទម្ងន់​របស់​ខ្ញុំ​ដែរ​.. ថ្ងៃ​ខ្លះ​ខ្ញុំ​សប្បាយ​ហក់​លោត, ហើយ​ថ្ងៃ​ខ្លះ​ខ្ញុំ​ចង់​ដេក​ក្រាប​លើ​ដី.. ចង់​ឲ្យ​ព្រះ​អាទិត្យ​លិច​ទៅ​ជា​មួយ​ថ្ងៃ​ចាស់, មិន​ចង់​ឲ្យ​រះ​ឡើង​វិញ​ជាមួយ​ថ្ងៃ​ថ្មី (បើ​អ្នក​អាន អាន​យល់​នូវ​អ្វី​ដែល​ខ្ញុំ​ចង់​និយាយ)។ ខ្ញុំ​នៅ​បន្ត​លេប​ថ្នាំ ទោះ​បី​ជា​ពេល​ខ្លះ ថ្នាំ​ហាក់​មិន​ជួយ​អ្វីខ្ញុំ​សោះ​ក៏​ដោយ…

រូង​ងងឹត កម្លាំង​ចិត្ត និង​ខ្លួន​ឯង

ខែ​កញ្ញា នៅ​ពេល​ដែល​ខ្ញុំ​ដឹង​ខ្លួន​ថា ខ្ញុំ​ឈឺ, ខ្ញុំ​សម្រេច​ចិត្ត​ដក​ថយ​ពី​សង្គម​ដើម្បី​ថែ​ខ្លួន​។ ខ្ញុំ​ធ្វើ​ការ​រួច ត្រឡប់​ទៅ​ផ្ទះ បិទ​ម៉ាស មើល​រឿង លេប​ថ្នាំ រួច​គេង​។ ខ្ញុំ​ធ្វើ​បែប​នេះ​រាប់​សប្ដាហ៍.. ខ្ញុំ​ចាយ​ពេល​នៅ​ក្នុង​បន្ទប់​គេង​ដែល​ខ្ញុំ​ហៅ​ថា​រូងងងឹត ច្រើន​ជាង​កន្លែង​ភ្លឺ។ ខ្ញុំ​នៅ​ជាមួយ​ខ្លួន​ឯង ច្រើន​ជាង​អ្នក​ដទៃ។ ខ្ញុំ​មិន​បាន​រៀន​អ្វី​ថ្មី​ក្នុង​អំឡុង​ពេលនុះ​ទេ តែ​ខ្ញុំ​គិត​ថា យល់​ពី​ខ្លួន​ឯង​ច្រើន​ជាង​មុន ជា​ការ​អភិវឌ្ឍ​ខ្លួន​ឯង​មួយ​ដែរ​។

មិត្ត

ដូច​ខ្ញុំ​លើក​ឡើង​ពី​ខាង​ដើម​អ៊ីចឹង ថា មិត្ត​ភក្តិ​នៅ​ក្បែរ​ខ្លួន​ខ្ញុំ​ច្រើន​ដែល​យល់​ពី​ខ្ញុំ​។ ប៉ុន្តែ​ទន្ទឹម​គ្នា​ហ្នឹង ក៏​មាន​អ្នក​ដែល​មិន​យល់​ពី​ខ្ញុំ​ដែរ​។ មិន​មែន​គេ​មិន​យល់​ថា​ខ្ញុំ​ឈឺ​ឡើយ ប៉ុន្តែ​ដោយ​សារ​តែ​អត្តចរិត​របស់​គេ ទម្លាប់​របស់​គេ ដែល​មិន​អនុញ្ញាត​ឲ្យ​គេ​យល់​ពី​ខ្ញុំ​បាន​។ ឧទាហរណ៍៖ មិត្ត​ដែល​ប្រកាន់, និង​មិត្ត​ដែល​មានះ​យក​ឈ្នះ​ជា​ដើម​។ ខ្ញុំ​គ្មាន​ទម្លាប់​រើស​អើង​ទេ តែ​ដើម្បី​សុខ​ភាព​ខ្លួន​ឯង អារម្មណ៍​ខ្លួន​ឯង ពេល​ខ្លះ​ខ្ញុំ​ត្រូវ​បង្ខំ​ចិត្ត​គេច​ពី​មនុស្ស​ខ្លះ ដើម្បី​សេចក្ដី​ស្ងប់​មួយ​ពេល​សម្រាប់​ខ្លួន​ឯង និង​កាត់​បន្ថយ​អារម្មណ៍​មិន​ល្អ​របស់​ខ្ញុំ ដែល​អាច​ជះ​លើ​គេ​។

មិត្ត​ខ្ញុំ​ខ្លះ​ទំនង​ជា​មិន​យល់​ពី​រឿង​នេះ​ទេ​។ តែ​មិន​អី​ទេ គេ​នឹង​យល់​បើ​គេ​ចង់​។ តែ​បើ​គេ​មិន​ចង់​ហើយ បើ​ទោះ​បី​ជា​ខ្ញុំ​មាន​ហេតុផល​រាប់​លាន​ពន្យល់​ទៀត គេ​គង់​នៅ​តែ​មិន​យល់​ដដែល​។

ខ្ញុំ​អាយុ​បាន ២៦​ឆ្នាំ ៥​ខែ ហើយ គិត​ត្រឹម​ថ្ងៃ​នេះ​។ ខ្ញុំ​ឲ្យ​តម្លៃ​មិត្តភាព និង​ខ្វល់​ពីមិត្ត​ច្រើន​ជាង​ខ្លួន​ឯង​។ ពេល​ខ្លះ​អន់​ចិត្ត ពេល​គេ​ប្រាប់​កុំ​ឲ្យ​ខ្វល់​ពី​គេ.. ឬ​ខ្ញុំ​ពិត​ជា​ត្រូវ​ធ្វើ​ខ្លួន​អាត្មា​និយម ខ្វល់​ពី​ខ្លួន​ឯង​មុន​អ្នក​ដទៃ​មែន? ខ្ញុំ​គិត​ថា ខ្ញុំ​អាច​នឹង​ប្រើ​ពេល​មួយ​ជីវិត​កែ​ទម្លាប់​របស់​ខ្ញុំ​ឲ្យ​ទៅ​ជា​បែប​នោះ..

សួស្ដី​ឆ្នាំ​ថ្មី!

 

ខែធ្នូ 26, 2018 at 2:18 ល្ងាច មតិ ១


Instagram

ខែធ្នូ 2018
អា ព្រ សុ
« តុលា   មករា »
 1
2345678
9101112131415
16171819202122
23242526272829
3031  

បណ្ណសារ


%d bloggers like this: