ក្រោមកំដៅថ្ងៃដ៏សែនក្ដៅហួតហែង, ខ្ញុំ និង នីបានទៅដល់វិទ្យាល័យព្រះស៊ីសុវត្ថិ នាវេលាម៉ោងជិតពីររសៀលក្នុងបំណងដើម្បីចាំស្ដាប់លទ្ធផលនៃការប្រឡងបាក់ឌុបរបស់យើង។
ចុះពីលើម៉ូតូ ខ្ញុំដើរតម្រង់កន្លែងលក់ទឹកដែលមានដាក់តាំងភេសជ្ជៈជាច្រើនតម្រៀបគ្នា… ទិញទឹករួច ខ្ញុំក៏បន្តដំណើរចូលក្នុងបរិវេណវិទ្យាល័យជាមួយនឹងដបទឹក… បេក្ខជនជាច្រើនកុះករក៏បានមកដល់ជាបន្តបន្ទាប់… ក្នុងនោះដែរក៏មាននិស្សិតនៃសាកលវិទ្យាល័យមួយចំនួនចូលរួមចែកលិខិតផ្សព្វផ្សាយសាកលវិទ្យាល័យរបស់ខ្លួន និង លិខិតប្រកាសពីដំណឹងប្រឡងអាហារូបករណ៍នានាដល់សិស្សានុសិស្សផងដែរ។ រំពេចនោះ និស្សិតសាកលវិទ្យាល័យ ស៊ីតិច (សាលាក្នុងក្ដីសុបិន្តរបស់នី ដែលនឹងក្លាយជាការពិតក្នុងរយៈពេលបន្តិចទៀតនេះ ដោយគ្មានឧបសគ្គមករារាំង) ម្នាក់ហុចកាបូបមួយមកឱ្យខ្ញុំ (តែម្នាក់ ខណៈដែលពេលនោះមានសិស្សជាច្រើនដើរចូលព្រមគ្នាដែរ!!! ^^ មុខមានប្រជាប្រិយដល់ម្ល៉ឹង… មិនដែលដឹងសោះ! 
) ដែលក្នុងនោះមានព័ត៌មានទាក់ទងនឹងសាលាស៊ីតិច ព្រមជាមួយប៊ិកពីរផងដែរ។
ចូលដល់ក្នុងសាលា ខ្ញុំបានជួបមិត្តចាស់ជាច្រើនដែលធ្លាប់រៀនជាមួយគ្នាកាលពីថ្នាក់ទី ៧, ៨… ពួកយើងនិយាយគ្នាច្រើន! មួយស្របក់ក្រោយមក ដំរី (សុវណ្ណរចនា) ក៏មកដល់, ហើយក៏បាត់ខ្លួនទៅភ្លាមៗជាមួយនី ដោយទុកឱ្យខ្ញុំនៅនិយាយគ្នាជាមួយបងធម៌របស់ខ្ញុំប៊ិះតែខះទឹកមាត់…
ម៉ោង ៣, ការប្រកាសលទ្ធផលចាប់ផ្ដើម… សិស្សទាំងអស់ប្រមូលគ្នានៅមុខទីចាត់ការ, ក្នុងនោះក៏មានខ្ញុំផងដែរ! ទឹកមុខរីករាយរបស់អ្នកប្រឡងជាប់, ទឹកភ្នែករបស់អ្នកធ្លាក់ ធ្វើឱ្យខ្ញុំភ័យជាថ្មី…
[...បន្ទប់លេខ ៣៥ ជាប់ទាំងអស់... បន្ទប់លេខ ៣៦ ជាប់ទាំងអស់... បន្ទប់លេខ ៣៧ ធ្លាក់ម្នាក់...] បន្ទប់លេខ ៣៧ ជាបន្ទប់របស់ខ្ញុំ! តើនរណានឹងធ្លាក់? តើនរណានឹងធ្លាក់… ខ្ញុំក្ដាប់ដៃយ៉ាងណែន… តើនរណានឹងធ្លាក់???
[...លេខតុ ៩១៤...] 
មិនមែនជាខ្ញុំ ហើយក៏មិនមែនជានីដែរ!
«អូនឯងជាប់ហើយមែនអត់?» បងធម៌ខ្ញុំងាកមកសួរខ្ញុំ ក្នុងទឹកមុខសង្ឃឹមថា ចម្លើយរបស់ខ្ញុំគឺ «ចាស៎»… ខ្ញុំគ្រាន់តែងក់ក្បាល និង ញញឹមទៅកាន់គាត់បន្តិចជំនួសចម្លើយដែលគាត់ចង់បាន!
បងប្រុសរបស់ខ្ញុំសម្លឹងខ្ញុំឡើងភ្លឹក រួចបន្ទោសតិចៗ «ប្រឡងជាប់ទាំងមូល អត់មានរំភើបអីបន្តិចទេហ្អី?»… ខ្ញុំមិនឆ្លើយតែបែរជាញញឹមដាក់គាត់ទៀត, ទីបំផុត អ្វីដែលទទួលបានគឺ (ស៊ីម៉ាក្រញ៉ទៅ! 
)។
ទោះបីជាខ្ញុំជាប់ក៏ដោយ, តែក្នុងចិត្តខ្ញុំនៅមិនទាន់ស្រឡះល្អនៅឡើយ ព្រោះខ្ញុំនៅបារម្ភពី ដំរី, គេត្អូញថាធ្វើមិនសូវបាន… អញ្ចឹងហើយទើបខ្ញុំប្រញាប់រត់រកមើលគេភ្លាម…
«…រចនាយំមួយហើយ!» មិត្តម្នាក់ប្រាប់ខ្ញុំ! ពេលនោះ ខ្ញុំស្ទើរតែយំចេញមកដែរហើយ តែខ្ញុំនៅតែសួរបញ្ជាក់ម្ដងទៀត ព្រោះហាក់មិនទុកចិត្តនូវអ្វីដែលខ្លួនឯងគិត… «រចនា… ជាប់ហើយ, មែនទេ?» មិត្តរបស់ខ្ញុំងក់ក្បាល… ហ្អើយ!!! ជាប់ក៏យំដែរ! ធ្វើឱ្យឯងភ័យសន្ធឹក… ហៅថាតារាទឹកភ្នែកមិនខុសមែន!!!
លទ្ធផលរបស់ខ្ញុំគឺ៖
ពិន្ទុប្រចាំឆ្នាំ C
គណិតវិទ្យា E
រូបវិទ្យា B
គីមីវិទ្យា D
ជីវវិទ្យា F (ធ្លាក់)
ភាសាខ្មែរ C
ភូមិវិទ្យា F (ធ្លាក់)
ប្រវត្តិវិទ្យា B
សីលធម៌ A
ផែនដីវិទ្យា C
ភាសាបរទេស B
លំដាប់ពិន្ទុ 96,656 (ជាប់)
និទ្ទេសរួម C
»»» នី D
»»» សុវណ្ណរចនា C
បន្ទប់របស់ខ្ញុំមានធ្លាក់ម្នាក់, និទ្ទេស B ម្នាក់, C ពីរនាក់, D បួននាក់ (អ្នកដែលនៅសល់គឺ E)
រហូតមកដល់ពេលនេះ គ្មានរបាយការណ៍ជាក់លាក់ណាមួយបង្ហាញឱ្យដឹងពីអត្រានិទ្ទេសរបស់សិស្សឱ្យបានជាក់លាក់នៅឡើយទេ៕
»»»មើលរូបនៅទីនេះ
អាចម៍ផ្កាយ បាននិយាយ,
ខែ សីហា 31, 2008 ម៉ោង 9:01 ព្រឹក
បាក់ឌុបចឹងៗអរម៉េចបាន បើជាប់សិស្សពូកែទាំងមូល នៅមិនទាន់ថាអរផងហ្នស់!
santepheaplim បាននិយាយ,
ខែ កញ្ញា 1, 2008 ម៉ោង 4:11 ព្រឹក
Congratulation!
saronweb បាននិយាយ,
ខែ កញ្ញា 1, 2008 ម៉ោង 11:58 ព្រឹក
សួស្តីរចនា! ហាស់ហា…មើលទៅដូចជាសប្បាយណាស់ហ្ន បានប្រលងជាប់។ ចូលរួមត្រេកអរផងណា!
naraths បាននិយាយ,
ខែ កញ្ញា 2, 2008 ម៉ោង 3:10 ព្រឹក
ហាហា បាន F ច្រើនម៉្លេះពៅពន្លក!! និយាយមិនអួតទេកាលនោះ បាន F ពីរដែរគឺផែនដី និងពិន្ទុប្រចាំឆ្នាំ
សរុប D បាតតារាង ។
រចនា បាននិយាយ,
ខែ កញ្ញា 2, 2008 ម៉ោង 4:24 ព្រឹក
បងអាចម៍ផ្កាយ៖ ហ្នឹងហើយ!
បងភាព៖ អរគុណច្រើន!
Saronweb: អរគុណច្រើន!
បងរដ្ឋ៖ បានតែពីរមុខសោះ ថាច្រើនដែរ!
Boeun បាននិយាយ,
ខែ កញ្ញា 2, 2008 ម៉ោង 5:39 ព្រឹក
ចូលរួមរំភើបផង
Chanroeun Pa បាននិយាយ,
ខែ កញ្ញា 2, 2008 ម៉ោង 8:43 ព្រឹក
Hi Dear,
I am very delighted to share with you that I just founded another web blog, CAMBOSASTRA. Please go to http://cambosastra.wordpress.com and download some ebooks about Cambodia. Please let me know if you want to contribute any ebooks about Cambodia to CAMBOSASTRA.
Cheers,
Chanroeun
Phnom Penh បាននិយាយ,
ខែ កញ្ញា 2, 2008 ម៉ោង 12:13 ល្ងាច
Can’t read any word in your site, mate! ????
Cambodia news បាននិយាយ,
ខែ កញ្ញា 3, 2008 ម៉ោង 9:15 ព្រឹក
u cannot read khmer Unicode it is because that your PC has not been installed Khmer Unicode font.
sophonrith em បាននិយាយ,
ខែ កញ្ញា 6, 2008 ម៉ោង 3:00 ព្រឹក
ពិតជាកំណាព្យដ៏មានអត្ថន័យមែន….ជាអ្នកក្លាហានទិសខាងជើង……
បញ្ញា បាននិយាយ,
ខែ កញ្ញា 9, 2008 ម៉ោង 12:58 ល្ងាច
សូមចូលរួមរីករាយផងដែល ពួកមាក់បាន និទេ្ទសល្អ ណារ៎!!!! ហើយឆ្នាំក្រោយ ខ្ញុំប្រលងម៉ាដង់មិនមិចទេ
…..!!!
បញ្ញា បាននិយាយ,
ខែ កញ្ញា 9, 2008 ម៉ោង 1:02 ល្ងាច
ភ័យពេកសរសេរខុស….(មិនដឹងមិចទេ) មិនមិចទេ
វេហាស័ បាននិយាយ,
ខែ កញ្ញា 12, 2008 ម៉ោង 9:53 ព្រឹក
រចនា និយាយដល់ឈ្មោះ វិទ្យាល័យ ព្រះស៊ីសុវត្ថិ ខ្ញុំពិតជានឹកអនុស្សាវរីយ៍ចាស់ៗរបស់ខ្ញុំណាស់។ អរគុណ!
khmerpoemboy បាននិយាយ,
ខែ កញ្ញា 13, 2008 ម៉ោង 12:11 ល្ងាច
Congradulation!!
ការីម បាននិយាយ,
ខែ កញ្ញា 16, 2008 ម៉ោង 4:03 ព្រឹក
សួស្តីប្អូនស្រី! បងជួយអបអរសាទរចំពោះលទ្ធផលដែលប្អូនសំរេចបាន។ យូរខែថ្ងែហើយដែលបងមិនបានចូលមកដល់ប្លក់នេះ មិនដឹងជាមានសភាពប្រែប្រួលយ៉ាងណាទេនៅក្នុងប្លក់?ព្រោះជាប់ដែបន្តិចនៅក្នុងការសិក្សា។ អោយបងចូលរួមរីករាយជាមួយម្នាក់ផង…! សូមលើកកែវមួយឡើងដើម្បីជោគជ័យ និងអនាគតរបស់ប្អូន!…
Khmer Emperor បាននិយាយ,
ខែ តុលា 3, 2008 ម៉ោង 5:43 ព្រឹក
ឃើញប្អូនៗរៀនបានពិន្ទុខ្សោយយ៉ាងនេះបងមានការបារម្ភពីអនាគតប្អូនៗ
និងអនាគតប្រទេសខ្មែរយើងណាស់។
ចន្ត្រា បាននិយាយ,
ខែ តុលា 9, 2008 ម៉ោង 1:04 ព្រឹក
សូមអបអរប្អូនទាំង២ដែលប្រឡងជាប់ ហើយបន្ដការផ្សព្វផ្សាយការបង្កើតប្លក់ផ្ទាល់ខ្លួនជាភាសាខ្មែរ…
ហើយមេចបានជា ស៊ីតិច ជាសាលាក្នុងក្ដីស្រមៃរបស់ នី ? តើនីចង់រៀនខាងអី ហើយចុះរចនាវិញចង់ខាងអីដែរ?
រចនា បាននិយាយ,
ខែ តុលា 12, 2008 ម៉ោង 10:31 ព្រឹក
នីចង់រៀន Design ហើយគេក៏បានរៀន! ចំណែកខ្ញុំ ចង់រៀន អក្សរសាស្ត្រខ្មែរ, តែដោយសារលក្ខខណ្ឌគ្រួសារ តម្រូវឱ្យខ្ញុំជ្រើសយក ច្បាប់ ទៅវិញ! គួរឱ្យអាណិតណាស់មែនទេ?
តែមិនអីទេ! ជ្រុលជារើសរៀនទៅហើយ, ខ្ញុំនឹងខំរៀនឱ្យអស់ពីលទ្ធភាព! មិនចុះចាញ់ងាយៗទេ!!! 
naraths បាននិយាយ,
ខែ តុលា 14, 2008 ម៉ោង 1:13 ល្ងាច
បើស្រឡាញ់ អក្សរសាស្ត្រខ្មែរនឹងនៅក្នុងចិត្តយើងជានិច្ច ។ រៀនច្បាប់ គឺមានន័យថាស្និទ្ធនឹងអក្សរសាស្ត្រខ្មែរដែរតើ!! រចនានឹងបានចូលក្នុងបណ្ណាល័យច្បាប់នៅទីនោះ ហើយនឹងចាប់អារម្មណ៍ថាការប្រើពាក្យខ្មែរនៅទីនោះវាយ៉ាងណាហើយ ។ សាលានោះពីមុនមានរៀនច្បាប់ជាភាសាខ្មែរ+បារាំង+អង់គ្លេស តែឥឡូវ ជំនាន់នេះគេបង្កើតថ្នាក់រៀនច្បាប់ជាភាសាខ្មែរ+ជប៉ុន+អង់គ្លេស ហើយ ។ មិនប្រូម៉ូសិនទេ តែខ្ញុំរៀននៅហ្នឹងដឹងខ្លះៗដែរ ខឹខឹខឹ
ហង្សមាស MP3 Blog បាននិយាយ,
ខែ តុលា 21, 2008 ម៉ោង 9:37 ព្រឹក
សរសេរច្រើនពេកអញ្ចឹង មិនដឹងអានចាប់ពិកន្លែងណាមុនទេ ខ្ជិលអានណាស់។
មុខចឹងសោះ មិនគួរអោយជឿថាបាននិទ្ទេស C សោះ សុំសរសើរ។
សំណាង បាននិយាយ,
ខែ តុលា 27, 2008 ម៉ោង 6:20 ព្រឹក
អុញ!ខំតែចាំមើលប្លកមួយទៀតឯណោះ អត់ដឹងថាមកនៅផ្ទះចាស់សោះ…. ស្មានតែទៅណាបាត់ហើយ ទៅអើតមើលផ្ទះមួយទៀត អត់ឃើញអ្នកណា មិនទ្រាំតែគោះទ្វារទេ ធាក់ទ្វារជិតរបើកទៅហើយក៏អត់ឃើញអ្នកណាចេញមកស្វគមន៍។
ថ្ងៃនេះ សំណាថល្អវង្វេងផ្លូវបានមកដល់ផ្ទះរបស់អូន…. យ៉ាប់ម៉ង
តែជាយ៉ាងណាក៏អបអរចំពោះលទ្ឋផលBac II របស់អូន។